ຂ່າວ
  • Register
ວັນຈັນ, 30 ເມສາ 2018 00:00

ເປີດງານມະຫະກຳຊັບສິນທາງປັນຍາຄັ້ງທີ 4

ກະຊວງວິທະຍາສາດ ແລະ ເຕັກໂນໂລຊີ (ກວຕ) ຮ່ວມກັບ ສູນກາງສະຫະພັນແມ່ຍິງລາວ (ສສຍ) ໄດ້ຈັດງານ

ມະຫະກຳຊັບສິນທາງປັນຍາ ປີ 2018 ພາຍໃຕ້ຄໍາຂວັນ “ແມ່ຍິງສ້າງນະວັດຕະກຳ ແລະ ປະດິດຄິດແຕ່ງ: ເປັນ ພະລັງແຫ່ງການປ່ຽນແປງ” ຫຼື ພາສາອັງກິດວ່າ: “Powering change: Women in innovation and creativity” ໃນລະຫວ່າງວັນທີ 21 ເມສາ - 01 ພຶດສະພາ 2018 ຢ່າງເປັນທາງການ.

ພິທີເປີດໄດ້ຈັດຂຶ້ນໃນວັນທີ ວັນ­ທີ 23 ເມສາ 2018 ທີ່ ສູນການຄ້າ ລາວ-ໄອເຕັກ (ຕຶກເກົ່າ) ຊຶ່ງໄດ້ ຮັບກຽດການເຂົ້າຮ່ວມເປັນປະທານຮ່ວມຂອງ ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ; ທ່ານ ບໍ່ວຽງຄໍາ ວົງດາລາ, ລັດຖະມົນຕີ ກວຕ ແລະ ທ່ານ ນາງ ອິນລາວັນ ແກ້ວບຸນພັນ, ປະທານຄະນະບໍລິ ຫານງານ ສສຍ.

ທ່ານ ລັດຖະມົນຕີ ກວຕ ກ່າວໃນພິທີເປີດງານດັ່ງກ່າວວ່າ: ໃນທ່າມກາງບັນຍາກາດ ທີ່ທົ່ວພັກ ແລະ ທົ່ວປວງຊົນລາວບັນດາເຜົ່າ ພວມອອກແຮງແຂ່ງຂັນສືບຕໍ່ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 8 ແຫ່ງຊາດ, ມື້ນີ້ພວກເຮົາ ໄດ້ຮ່ວມກັບບັນດາເຈົ້າ ຂອງຊັບສິນທາງປັນຍາ, ນັກປະດິດສ້າງ, ນັກປະດິດຄິດແຕ່ງ, ນັກທຸລະກິດ, ຜູ້ປະກອບການ ແລະ ຜູ້ສະໜັບສະໜູນການໄດ້ຈັດງານມະຫະກຳຊັບສິນທາງປັນຍາ 2018 ຄັ້ງນີ້ຂຶ້ນ ຊຶ່ງຈະເປັນເວທີອັນສຳຄັນ ເພື່ອຊຸກຍູ້ສົ່ງເສີມວຽກ ງານຊັບສິນທາງປັນຍາ ຂອງປະເທດເຮົາໃນການພັດທະນາເສດຖະກິດ-ສັງຄົມ ແລະ ວັດທະນະທຳ ເພື່ອຫັນປະເທດເຮົາໃຫ້ເປັນອຸດສາຫະກຳ ແລະ ທັນສະໄໝເທື່ອ ລະກ້າວ, ເພື່ອແກ້ໄຂ ແລະ ຫຼຸດຜ່ອນຄວາມທຸກຍາກ ຂອງປະຊາຊົນບັນດາເຜົ່າ ໂດຍສະເພາະ ແມ່ນແມ່ຍິງ ຕາມຄຳຂວັນທີ່ວ່າ “ເສີມສ້າງຊັບສິນທາງປັນຍາ ເພື່ອພັດທະນາເສດຖະກິດ-ສັງຄົມ ແລະ ວັດທະນະທຳ ແບບຍືນຍົງ” ແລະ ຈະມີການຈັດບັນດາກິດຈະກຳ ແລະ ໂຄສະນາເຜີຍແຜ່ຄວາມຮັບຮູ້ທາງດ້ານ ຊັບສິນທາງປັນຍາ ເພື່ອເຫັນໄດ້ຄວາມສໍາຄັນຂອງວຽກງານຊັບສິນທາງປັນຍາ ຕໍ່ການພັດທະນາເສດຖະກິດ-ສັງຄົມ ແລະ ວັດທະນະທໍາຊຶ່ງເຮັດໃຫ້ມວນຊົນ ໂດຍສະເພາະ ແມ່ນນັກຄົ້ນຄວ້າ, ນັກວິທະຍາສາດ, ນັກປະດິດສ້າງ, ນັກປະດິດຄິດແຕ່ງ, ນັກຮຽນຮູ້ນັກສຶກສາໄດ້ຮັບຮູ້ຂໍ້ມູນຂ່າວສານ ກ່ຽວກັບວຽກງານຄຸ້ມຄອງ ແລະ ການປົກປ້ອງ ຊັບສິນທາງປັນຍາເຊັ່ນ: ສິດທິບັດ, ອະນຸສິດທິບັດ, ແບບອຸດສາຫະກຳ, ແບບຜັງວົງຈອນລວມ, ເຄື່ອງໝາຍການຄ້າ, ຖິ່ນກໍາເນີດ, ພັນພືດໃໝ່, ລິຂະສິດ ແລະ ສິດກ່ຽວ ຂ້ອງກັບລິຂະສິດ ແລະ ພູມປັນຍາພື້ນບ້ານອັນເປັນມູນເຊື້ອ ໃນການພັດທະນາເສດຖະກິດ-ສັງຄົມ ແລະ ວັດທະນະທຳ. ພ້ອມກັນນີ້ ຍັງເປັນການສະແດງເຖິງ ການເຄົາ ລົບສິດ ແລະ ການປົກປ້ອງຜົນປະໂຫຍດ ຂອງນັກຄົ້ນຄວ້າ, ນັກປະດິດສ້າງ ແລະ ນັກປະດິດຄິດແຕ່ງ ເພື່ອຊຸກຍູ້ສົ່ງເສີມ ຄວາມຄິດສ້າງສັນ ຂອງມວນມະນຸດ.

ທ່ານກ່າວຕື່ມວ່າ: ໃນໄລຍະຜ່ານມາ, ຂະແໜງຊັບສິນທາງປັນຍາ ໄດ້ເຂົ້າຮ່ວມເຄື່ອນໄຫວນຳບັນດາອົງການຊັບສິນທາງປັນຍາຂອງສາກົນຢ່າງຕັ້ງໜ້າ ເຊັ່ນ: ໜ່ວຍງານທາງຊັບສິນທາງປັນຍາອາຊຽນ, ສົນທິສັນຍາປາຣີ, ສົນທິສັນຍາວ່າດ້ວຍການຮ່ວມມືດ້ານສິດທິບັດ, ສົນທິສັນຍາເບີນ ແລະ ອານຸສັນຍາມາດຣິດ. ຄຽງຄູ່ກັບ ການເຄື່ອນໄຫວໃນເວທີສາກົນ ດັ່ງທີ່ໄດ້ກ່າວມາຂ້າງເທິງນັ້ນ, ກົມຊັບສິນທາງປັນຍາ ຂອງ ກວຕ ຍັງໄດ້ລົງຮາກຖານ ເພື່ອສ້າງຄວາມເຂົ້າໃຈ ແລະ ຄວາມເຂັ້ມແຂງທາງ ດ້ານວິຊາການໃຫ້ແກ່ພະນັກງານຂັ້ນທ້ອງຖິ່ນ, ຜູ້ປະກອບການຂະໜາດນ້ອຍ ແລະ ກາງ (SME), ນັກທຸລະກິດ, ກຸ່ມຜູ້ຜະລິດ, ຊາວກະສິກອນ ເຫັນໄດ້ຄວາມສໍາຄັນ ຂອງວຽກງານຊັບສິນທາງປັນຍາ ເຂົ້າສູ່ຂະບວນການຜະລິດເປັນສິນຄ້າ ພາຍໃຕ້ຄຳຂວັນທີ່ວ່າ: “ໜຶ່ງຜະລິດຕະພັນ ໜຶ່ງຊັບສິນທາງປັນຍາ” ແລະ ເພື່ອປະຕິບັດມະຕິ ເລກທີ 03/ກກມ ຂອງກົມການເມືອງສູນກາງພັກ ກ່ຽວກັບ ວຽກງານສາມສ້າງ ໃນການເຄື່ອນໄຫວຈັດຕັ້ງຄຸ້ມຄອງ ວຽກງານຊັບສິນທາງປັນຍາ ແຕ່ສູນກາງລົງຮອດທ້ອງຖິ່ນ, ປະສານງານ ເພື່ອໂຄສະນາເຜີຍແຜ່, ຊຸກຍູ້ສົ່ງເສີມໃຫ້ເກີດມີຫົວຄິດປະດິດສ້າງ, ຫົວຄິດປະດິດແຕ່ງ, ສ້າງຈິດສຳນຶກໃນການນັບຖືສິດ ຂອງເຈົ້າຂອງຜົນງານ ແລະ ເຄື່ອນ ໄຫວໃນການບັງຄັບປະຕິບັດສິດຊັບສິນທາງປັນຍາ. ໃນໄລຍະຜ່ານມາໄດ້ເອົາໃຈໃສ່ບໍລິການດ້ານຊັບສິນທາງປັນຍາໃຫ້ແກ່ສັງຄົມ ເຊັ່ນ: ໄດ້ຮັບຄຳຮ້ອງຂໍຈົດທະບຽນ ເຄື່ອງໝາຍການຄ້າ ຫຼາຍກວ່າ 40.000 ສະບັບ, ໄດ້ຮັບຄຳຮ້ອງຂໍສິດທິບັດ 583 ສະບັບ, ໄດ້ຮັບຄຳຮ້ອງຂໍຈົດທະບຽນແບບອຸດສາຫະກຳ 434 ສະບັບ, ໄດ້ຮັບແຈ້ງ ຂໍ້ມູນລິຂະສິດ ແລະ ສິດກ່ຽວຂ້ອງກັບລິຂະສິດ ຫຼາຍກວ່າ 545 ຜົນງານ, ໄດ້ເປັນເຈົ້າການປົກປ້ອງສິດຂອງເຈົ້າຂອງຊັບສິນທາງປັນຍາ ແລະ ນຳໃຊ້ມາດຕະການຕໍ່ຜູ້ລະ ເມີດ ຫຼາຍກ່ວາ 90 ກໍລະນີ.

ກົມຊັບສິນທາງປັນຍາ, ກວຕ ຍັງໄດ້ຮ່ວມກັບ ອົງການຊັບສິນທາງປັນຍາໂລກ ທາງດ້ານເຕັກນິກ ແລະ ໄດ້ຮັບການສະໜັບສະໜູນຈາກ ໂຄງການຮ່ວມມື ລາວ - ສະຫະລັດອາເມລິກາ ເພື່ອການເຊື່ອມໂຍງສາກົນ ແລະ ອາຊຽນ ສ້າງສູນຂໍ້ມູນຊັບສິນທາງປັນຍາທາງດ້ານເອເລັກໂຕຣນິກ ເພື່ອໃຫ້ການບໍລິການດ້ານຂໍ້ມູນຂ່າວສານ ຊັບສິນທາງປັນຍາ, ການຮັບຄໍາຮ້ອງຈົດທະບຽນຊັບສິນອຸດສາຫະກໍາ, ພັນພືດໃໝ່, ການແຈ້ງຂໍ້ມູນລິຂະສິດ ແລະ ສິດກ່ຽວຂ້ອງກັບລິຂະສິດ ແບບອອນລາຍ ຊຶ່ງຄາດວ່າ ຈະສາມາດເປີດໃຊ້ບໍລິການໃຫ້ແກ່ສາທາລະນະຊົນໃນມໍ່ໆນີ້. ກິດຈະກໍາທັງໝົດທີ່ກ່າວມານີ້ ໄດ້ເປັນສ່ວນໜຶ່ງໃນການປົກປ້ອງ ແລະ ສ້າງຄວາມຍຸຕິທຳ ກ່ຽວກັບຊັບສິນ ທາງປັນຍາ ແລະ ເປັນການປະກອບເຂົ້າໃນການພັດທະນາເສດຖະກິດ ແລະ ເຮັດໃຫ້ມີຄວາມຍຸຕິທຳໃນສັງຄົມ ຂອງປະເທດເຮົາ.

ໃນໄລຍະງານມະຫະກຳຊັບສິນທາງປັນຍາ, ກົມຊັບສິນທາງປັນຍາ, ກວຕ ຈະໃຫ້ບໍລິການໃຫ້ຄໍາປຶກສາ, ຈັດກອງປະຊຸມສໍາມະນາ ກ່ຽວກັບຄວາມຮູ້ພື້ນຖານ ກ່ຽວກັບຊັບສິນທາງປັນຍາ,ຈະແນະນໍາກ່ຽວກັບການຈົດທະບຽນຊັບສິນອຸດສາຫະກໍາ, ການແຈ້ງຂໍ້ມູນລິຂະສິດ ແລະ ສິດກ່ຽວຂ້ອງກັບລິຂະສິດ, ບໍລິການຮັບໃບຄໍາຮ້ອງ ຂໍຈົດທະບຽນຊັບສິນອຸດສາຫະກໍາ ແລະ ຄໍາຮ້ອງຂໍແຈ້ງຂໍ້ມູນລິຂະສິດ ແລະ ສິດກ່ຽວຂ້ອງກັບລິຂະສິດ. ທີ່ສຳຄັນ ພິເສດປີນີ້ ເປັນປີທີ່ສົ່ງເສີມ ແລະ ເຫັນໄດ້ຄວາມສຳຄັນ ຕໍ່ບົດບາດແມ່ຍິງຕໍ່ການພັດທະນາເສດຖະກິດສັງຄົມ ແລະ ວັດທະນະທຳ ຊຶ່ງອົງການຊັບສິນທາງປັນຍາໂລກໄດ້ວາງຄຳຂວັນ ເພື່ອສະເຫຼີມສະຫຼອງວັນຊັບສິນທາງປັນຍາ ໂລກຮ່ວມກັນວ່າ : “ແມ່ຍິງ ສ້າງນະວັດຕະກຳ ແລະ ປະດິດຄິດແຕ່ງ ເປັນພະລັງແຫ່ງການປ່ຽນແປງ (Powering change: Women in innovation and creativity)” ຊຶ່ງພາຍໃນງານນີ້ ມີການວາງສະແດງຜົນງານຂອງແມ່ຍິງ ພ້ອມກັບບັນດາກິດຈະກຳຕ່າງໆ ແລະ ການຈັດສຳມະນາ ກ່ຽວກັບແມ່ຍິງ ທີ່ຕິດພັນກັບວຽກງານ ຊັບສິນທາງປັນຍາ.

ນອກຈາກນັ້ນ, ໃນມື້ນີ້ ຈະໄດ້ມີພິທີມອບຂັນລາງວັນຊັບສິນທາງປັນຍາ ທີ່ໄດ້ຈົດທະບຽນເຄື່ອງໝາຍການຄ້າ ເຂົ້າໃນສິນຄ້າເພື່ອດຳເນີນທຸລະກິດ ຢູ່ ສປປ ລາວ ທີ່ມີຜົນສຳເລັດເກີນ 18 ປີ ທີ່ພວກເຮົາຈະສະເຫຼີມສະຫຼອງວັນຊັບສິນທາງປັນຍາໂລກ ຄົບຮອບ 18 ປີ ໃນວັນທີ 26 ເມສາ ນີ້ ໃຫ້ກັບ 4 ບໍລິສັດ ຄື: ບໍລິສັດ ເບຍລາວ, ບໍລິສັດ ລາວດິວຕີຟຼີ, ບໍລິສັດ ຈິບລາຍ ແລະ ລັດວິສາຫະກິດ ໂຮງພິມສຶກສາ ແລະ ໃນຄ່ຳຄືນຕະຫຼອດການຈັດງານ ກໍຈະມີການຈັດການສະແດງສິລະປະພື້ນເມືອງລາວ ອີກດ້ວຍ.

ໂອກາດນີ້,ນາງ ອິນລາວັນ ແກ້ວບຸນພັນ ກ່າວວ່າ: ປັດຈຸບັນ, ແມ່ຍິງລາວບັນດາເຜົ່າ ກໍຄື ແມ່ຍິງໃນທົ່ວໂລກພວມສູ້ຊົນຄົ້ນຄິດປະດິດສ້າງຜະລິດຕະພັນໃໝ່ໆ ໃນຂະບວນການຜະລິດເປັນສິນຄ້າທີ່ມີຄຸນນະພາບ ເຮັດໃຫ້ເສດຖະກິດຕະຫລາດມີການຂະຫຍາຍຕົວ, ສ້າງປະຖົມປັດໄຈໃຫ້ແກ່ຄຸນຄ່າດ້ານສະຕິປັນຍາ; ສິ່ງສຳຄັນການ ເຊື່ອມໂຍງໂລກາພິວັດເຕັກໂນໂລຊີ ໄດ້ເປີດຊ່ອງທາງ ແລະ ກາລະໂອກາດທີ່ເໝາະສົມໃນການປ່ຽນແປງນະວັດຕະກຳໃນການຮ່ວມມືປະດິດສ້າງສິ່ງໃຫມ່ໆ ໂດຍເລີ່ມຈາກ ການປ່ຽນແປງຊັບສິນທີ່ເປັນມູນເຊື້ອ ຫຼື ມູນມໍລະດົກທີ່ເປັນສີໄມ້ລາຍມືຂອງແມ່ຍິງ, ເຮັດໃຫ້ແມ່ຍິງເຂົ້າເຖິງສິດທິ ແລະ ສາມາດປົກປ້ອງສິດຜົນປະໂຫຍດອັນຊອບທຳ ຕິດພັນກັບການຊຸກຍູ້ສົ່ງເສີມເສດຖະກິດຄອບຄົວຈາກການພັດທະນາເສດຖະກິດ-ສັງຄົມ, ການພັດທະນາວິທະຍາສາດ-ເຕັກໂນໂລຊີ ແລະ ການພັດທະນາວຽກງານ ຊັບສິນທາງປັນຍາຢ່າງຮອບດ້ານ ຊຶ່ງສ້າງກາລະໂອກາດທີ່ເອື້ອອຳນວຍໃຫ້ແກ່ການປ່ຽນແປງນະວັດຕະກຳເຮັດໃຫ້ແມ່ຍິງໄດ້ເຂົ້າເຖິງແຫຼ່ງຄວາມຮູ້, ຫຼຸດຕົ້ນທຶນເພີ່ມກຳໄລ ແລະ ການຕະຫຼາດທີ່ຍືນຍົງ, ການນຳໃຊ້ລະບົບຊັບສິນທາງປັນຍາເຂົ້າສູ່ຂະບວນການເຊື່ອມໂຍງເສດຖະກິດຕະຫຼາດ, ໄດ້ເຮັດໃຫ້ຊີວິດການເປັນຢູ່ພາຍໃນຄອບຄົວ, ສະພາບແວດລ້ອມໃນໜ້າທີ່ວຽກງານ ແລະ ການແກ້ໄຂຄວາມທຸກຍາກຂອງແມ່ຍິງນັບມື້ນັບດີຂຶ້ນ. ໃນຊີວິດປະຈຳວັນ, ແມ່ຍິງໄດ້ສູ້ຊົນຄົ້ນຄິດຊອກຫາຄຸນຄ່າໃຫມ່ໃຫ້ ກັບຜະລິດຕະພັນທີ່ເປັນເອກະລັກ ແລະ ພູມປັນຍາຂອງແຕ່ລະທ້ອງຖິ່ນ, ຊູກຍູ້ສົ່ງເສີມຫົວຄິດປະດິດສ້າງທາງດ້ານວັດຖຸ ແລະ ຈິດໃຈ ກໍຄືສີໄມ້ລາຍມືອັນປານິດບັນຈົງ ທີ່ຍັງຄົງຢູ່ ແລະ ຖ່າຍທອດກັນມາຫລາຍເສັ່ນຄົນຈົນກາຍເປັນທ່າແຮງບົ່ມຊ້ອນໃຫມ່ໃນການສ້າງສະຕິປັນຍາຂອງແມ່ຍິງຢູ່ຫລາຍຂົງເຂດ ເຊັ່ນ: ໄດ້ສ້າງໂຄງການ ແລະ ກຸ່ມການຜະລິດກະສິກຳ-ຫັດຖະກຳອື່ນໆນັບມື້ນັບເພີ່ມຂື້ນ ເປັນຕົ້ນ.

ເຂົ້າຮ່ວມພິທີເປີດງານມະຫະກໍາຊັບສິນທາງປັນຍາປີນີ້ ມີບັນດາ ທ່ານ ລັດຖະມົນຕີ, ຮອງລັດຖະມົນຕີ, ບັນດາພະນັກງານ, ຫົວໜ່ວຍທຸລະກິດ ແລະ ຫ້າງ ຮ້ານຫຼາຍກວ່າ 300 ຮ້ານ.

 

ຂ່າວ: ນ. ທັດສະນີ ພົງຍັນດິດ

ຮູບພາບ: ບຸນທັນ ນັນທະວົງ

Latest from