ໜ້າຫຼັກ

ກ່ຽວກັບພວກເຮົາ

ຂ່າວ ແລະ ກິດຈະກຳ

ນິຕິກຳ

ສື່ ແລະ ສິ່ງພິມ

ຕິດຕໍ່ພວກເຮົາ

ຂ່າວ
  • Register
ວັນພະຫັດ, 15 ມີນາ 2018 00:00

ເປີດຫ້ອງກວດກາ ຄຸນນະພາບນໍ້າມັນເຊື້ອໄຟ ປະຈໍາດ່ານສາກົນ ແຫ່ງທີ 16 Featured

     ໂດຍປະຕິບັດຕາມພາລະບົດບາດ ຂອງ ກົມມາດຕະ ຖານ ແລະ ວັດແທກ, ກະຊວງວິທະຍາສາດ ແລະ ເຕັກໂນໂລຊີ ທັງປະຕິບັດຕາມກົດໝາຍວ່າດ້ວຍມາດຕະຖານ, ກົດໝາຍວ່າດ້ວຍການວັດແທກ ແລະ ກົດໝາຍວ່າດ້ວຍ ປົກປ້ອງຜູ້ຊົມໃຊ້. ໃນໄລຍະຜ່ານມາແມ່ນໄດ້ມີການລົງກວດສອບບໍລິມາດນໍ້າມັນເຊື້ອໄຟ ຕາມສະຖານີບໍລິການ ນໍ້າມັນເຊື້ອໄຟໃນທົ່ວປະເທດ ໂດຍແມ່ນ ພະແນກວິທະຍາສາດ ແລະ ເຕັກໂນໂລຊີ ເປັນຜູ້ຈັດຕັ້ງປະຕິບັດ ແລະໃນຊຸມປີຜ່ານມານີ້ ໄດ້ມີການຮ້ອງຮຽນໃຫ້ເອົາໃຈໃສ່ຕໍ່ຄຸນນະພາບນໍ້າມັນເຊື້ອໄຟທີ່ໃຊ້ຢູ່ ສປປ ລາວ, ໂດຍສະ ເພາະ ແມ່ນໄດ້ມີການຮ້ອງຮຽນຈາກພໍ່ແມ່ປະຊາຊົນ, ມີສາຍດ່ວນເຖິງສະພາແຫ່ງຊາດ, ການຮ້ອງຮຽນເຖິງກະຊວງວິທະຍາສາດ ແລະ ເຕັກໂນໂລຊີ, ກະຊວງອຸດສາຫະກໍາ ແລະ ການຄ້າ ແລະ ບັນດາຜູ້ປະກອບການທີ່ນໍາ ເຂົ້າພາຫະນະເພື່ອມາຈໍາໜ່າຍ ໄດ້ຮ້ອງຮຽນເລື່ອງຄຸນນະພາບນໍ້າມັນເຊື້ອໄຟ ເນື່ອງຈາກວ່າການນໍາໃຊ້ພາຫະນະ ເພກ່ອນກໍານົດມາດຕະຖານ.

      ດ້ວຍເຫດຜົນດັ່ງກ່າວ, ລັດຖະບານຈຶ່ງໄດ້ອະນຸຍາດໃຫ້ມີການກວດກາຄຸນນະພາບນໍ້າມັນເຊື້ອໄຟທົ່ວປະ ເທດ, ກະຊວງວິທະຍາສາດ ແລະ ເຕັກໂນໂລຊີ ໄດ້ມີ ການອອກແຈ້ງການ ແລະ ຖະແຫຼງຂ່າວຂອງລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ໃນເດືອນມິຖຸນາ2016 ກ່ຽວກັບການຈັດຕັ້ງປະຕິບັດການກວດຄຸນ ນະພາບນໍ້າມັນເຊື້ອໄຟທີ່ຜະລິດ, ນໍາເຂົ້າ-ສົ່ງອອກແລະຈໍາໜ່າຍຢູ່ໃນສປປລາວ.

     ທ່ານວຽງທອງວົງທະວິໄລ, ຫົວໜ້າກົມມາດຕະຖານ ແລະ ວັດແທກໄດ້ກ່າວ ໃນພິທີເປີດຫ້ອງກວດກາຄຸນນະພາບນໍ້າມັນເຊື້ອໄຟປະຈໍາດ່ານສາກົນ ພູເກືອ ວ່າ: ເລີ່ມແຕ່ເດືອນສິງຫາ 2016 ເປັນຕົ້ນມາແມ່ນໄດ້ເປີດຫ້ອງກວດກາຄຸນນະພາບປະຈໍາດ່ານສາກົນໄປແລ້ວ 15 ແຫ່ງຊຶ່ງຫ້ອງກວດກາຄຸນນະພາບນໍ້າມັນເຊື້ອໄຟປະຈໍາດ່ານ ສາກົນພູເກືອແຂວງອັດຕະປືເປັນແຫ່ງທີ 16 ພ້ອມກັນນັ້ນກໍຈະໄດ້ສືບຕໍ່ເປີດໃຫ້ຄົບທຸກແຂວງ ທີ່ມີການໍານໍ້າມັນເຊື້ອໄຟເຂົ້າມາຈໍາໜ່າຍເພື່ອຕອບສະໜອງຕາມຄວາມ ຮຽກຮ້ອງຕ້ອງການຂອງສັງຄົມ ແລະ ແກ້ໄຂບັນຫາປະກົດການຫຍໍ້ທໍ້ໃນສັງຄົມ ແລະ ປົກປ້ອງຜູ້ຊົມໃຊ້ນໍ້າມັນເຊື້ອໄຟຢູ່ ສປປ ລາວ ໃຫ້ຖື ຕ້ອງຕາມມາດຕະຖານແຫ່ງ ຊາດ ກໍຄື ມາດຕະຖານສາກົນ.

     ພິທີເປີດຫ້ອງກວດກາຄຸນນະພາບນໍ້າມັນເຊື້ອໄຟປະຈໍາດ່ານສາກົນ ພູເກືອ ໄດ້ຈັດຂຶ້ນໃນຕອນແລງຂອງວັນທີ 13 ມີນາ 2018, ທີ່ໂຮງແຮມຮວ່າງແອງອັດຕະປື, ແຂວງອັດຕະປື ໂດຍໃຫ້ກຽດເຂົ້າຮ່ວມພິທີຕັດແຖບຜ້າຂອງ ທ່ານ ບັນດິດ ສຈ. ບໍ່ວຽງຄໍາ ວົງດາລາ, ກໍາມະການສູນກາງພັກ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ (ກວຕ), ທ່ານ ເລັດໄຊຍະພອນ, ເລຂາພັກແຂວງ, ເຈົ້າແຂວງໆອັດຕະປື ມີຫົວໜ້າກົມມາດຕະຖານ ແລະ ວັດແທກ, ພະແນກວິທະຍາສາດ ແລະ ເຕັກໂນ ໂລຊີ ແຂວງອັດຕະປື, ພະແນກການອ້ອມຂ້າງແຂວງ, ບໍລິສັດຫ້າງຮ້ານ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ ຈໍານວນທັງໝົດ100 ກວ່າຄົນ.

   

   

 

 

                                                                                                                                                                                                                        ຮູບພາບ ແລະ ບົດຂ່າວ: ບິນລີ້ສີສຸລາດ