ຂ່າວສານ
  • Register
ວັນຈັນ, 02 ກໍລະກົດ 2018 00:00

ພິທີເຊັນສັນຍາໂຄງການກໍ່ສ້າງສູນວັດແທກ

ພິທີເຊັນສັນຍາການຮວ່ມມື ສ້າງສູນວັດແທກ ລະຫວ່າງ ສູນວັດແທກ, ກົມມາດຕະຖານ ແລະ ວັດແທກ,

ກະຊວງວິທະຍາສາດ ແລະ ເຕັກໂນໂລຊີ (ກວຕ) ແລະ ບໍລິສັດ ພັດທະນາເຕັກໂນໂລຊີລາວ ຈໍາກັດ, ສະຖາບັນ ວັດແທກ ເສີນຕູ, ແຂວງ ເສສວນ, ສປ ຈີນ ໄດ້ຈັດຂຶ້ນໃນຕອນແລງວັນທີ 21 ມິຖຸນາ 2018 ທີ່ໂຮງແຮມ ດອນຈັນ ພາເລດສ໌, ນະຄອນຫຼວງວຽງຈັນ.

ໂອກາດນີ້, ທ່ານ ວຽງທອງ ວົງທະວິໄລ, ຫົວໜ້າກົມມາດຕະຖານ ແລະ ວັດແທກ ໄດ້ຂຶ້ນລາຍງານ ໂດຍຫຍໍ້ ກ່ຽວກັບຄວາມເປັນມາຂອງ ໂຄງການຮ່ວມມືດັ່ງກ່າວ ແລະ ການກະກຽມເຊັນສັນຍາຄັ້ງນີ້ ຕໍ່ບັນດາ ທ່ານແຂກຜູ້ມີກຽດຊາບວ່າ: ໂດຍອີງຕາມແຜນພັດທະນາ ເສດຖະກິດ-ສັງຄົມ ແລະ ແຜນການ ເຄື່ອນໄຫວຍຸດ ທະສາດ ແຕ່ປີ 2016 ຫາ 2020 ຂອງວຽກງານມາດຕະຖານ ແລະ ວັດແທກ. ພາຍຫຼັງທີ່ ສປປ ລາວ ເຮົາ ໄດ້ເຂົ້າເປັນສະມາຊິກຂອງ ອົງການ ການຄ້າໂລກ (WTO) ແລະ ສະມາຊິກປະຊາຄົມເສດຖະກິດອາຊຽນແລ້ວ AEC), ວຽກງານມາດຕະຖານ ແລະ ວັດແທກ ແມ່ນວຽກງານໜຶ່ງ ທີ່ມີຄວາມສຳຄັນ ຕໍ່ການພັດທະນາ ແລະ ປົກປ້ອງຜູ້ຊົມໃຊ້ ແລະ ຖືວ່າເປັນວຽກງານໃໝ່ສຳລັບ ສປປ ລາວເຮົາ. ດັ່ງນັ້ນ, ການພັດທະນາ ແລະ ການສ້າງຄວາມເຂັ້ມແຂງໂຄງລ່າງພື້ນຖານ, ບຸກຄະລາກອນ ແມ່ນປັດໄຈຫຼັກຊຶ່ງ ກົມມາດຕະຖານ ແລະ ວັດແທກ ກໍໄດ້ກຽມພ້ອມໃນການເຊັນສັນຍາຮ່ວມມື ກັບບໍລິສັດ ດັ່ງກ່າວເປັນໄລຍະເວລາ 15 ປີ. ຖ້າວ່າການຮ່ວມມື ວຽກດັ່ງກ່າວມີປະສິດທິຜົນກໍຈະສາມາດຕໍ່ໄດ້ອີກ 15 ປີ ເພື່ອພັດທະນາສ້າງ ບັນດາຫ້ອງທົດລອງ ເຄື່ອງມືອຸປະກອນ ໃຫ້ໄດ້ມາດຕະຖານສາກົນ ISO 17025 ແລະ ລະບົບສິ່ງອຳນວຍຄວາມສະດວກຕ່າງໆຂອງສູນວັດແທກ.

ການເຊັນສັນຍາຮ່ວມມືກັນຄັ້ງນີ້ ປະກອບດ້ວຍບັນດາໜ້າວຽກຫຼັກ ຄື: ປຸກສ້າງອາຄານຫ້ອງການ, ສ້າງຫ້ອງທົດລອງພ້ອມທັງປະກອບເຄື່ອງມືອຸປະກອນຄົບ ຊຸດ, ສ້າງບຸກຂະລາກອນ ເພື່ອຮອງຮັບການໃຫ້ບໍລິການໃນຂົງເຂດວຽກງານການວັດແທກທາງດ້ານກົດໝາຍ ແລະ ວັດແທກທາງດ້ານວິທະຍາສາດຄື: ການກວດສອບ, ການກວດຄືນ, ການກວດທຽບຂອງບັນດາເຄື່ອງມືອຸປະກອບການວັດແທກ ຂອງບັນດາພາກທຸລະກິດໃນທົ່ວສັງຄົມ ຕໍ່ການພັດທະນາເສດຖະກິດ-ສັງຄົມ ເພື່ອສ້າງຄວາມ ເຊຶ່ອໝັ້ນ, ຮັບປະກັນຄວາມປອດໄພ ແລະ ສ້າງຄວາມຍຸຕິທຳໃນສັງຄົມຂອງບັນດາຜູ້ທີ່ນຳເຂົ້າ-ສົ່ງອອກ, ຜະລິດ ແລະຈຳໜ່າຍຢູ່ໃນ ສປປ ລາວເຮົາ.

ຜູ້ລົງນາມໃນສັນຍາໂຄງການກໍ່ສ້າງດັ່ງກ່າວ, ຕາງໜ້າຝ່າຍ ກວຕ ແມ່ນ ທ່ານ ວຽງທອງ ວົງທະວິໄລ, ຫົວໜ້າກົມມາດຕະຖານ ແລະ ວັດແທກ, ກວຕ; ທ່ານ ກະດິງທອງ ສິງດາລາ ຫົວໜ້າສູນວັດແທກ, ກົມມາດຕະຖານ ແລະ ວັດແທກ ແລະ ຕາງໜ້າຝ່າຍບໍລິສັດ ທ່ານ ນາງ ອຳນວຍ ໄຊຍະມາດ ປະທານ ບໍລິສັດ ພັດທະນາ ເຕັກໂນໂລຊີ ລາວ ຈຳກັດ.

ເຂົ້າຮ່ວມເປັນສັກຂີພິຍານໃນພິທີລົງນາມດັ່ງກ່າວ ມີ ທ່ານ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ, ລັດຖະມົນຕີ ກວຕ, ທ່ານ ຮອງລັດຖະ ມົນຕີ ກວຕ, ບັນດາຫົວໜ້າຫ້ອງການ, ກົມ, ສະຖາບັນ ແລະ ພະນັກງານທີ່ກ່ຽວຂ້ອງທັງສອງຝ່າຍ.

ບົດຂ່າວ: ນ. ທັດສະນີ ພົງບັນດິດ

ຮູບພາບ: ພະແນກຂ່າວສານ ແລະ ປະຊາສຳພັນ