ໜ້າຫຼັກ

ກ່ຽວກັບພວກເຮົາ

ຂ່າວ ແລະ ກິດຈະກຳ

ນິຕິກຳ

ສື່ ແລະ ສິ່ງພິມ

ຕິດຕໍ່ພວກເຮົາ

ຂ່າວສານ
  • Register
ວັນຈັນ, 25 ມີຖຸນາ 2018 00:00

ກວຕ ປັບປຸງກົງຈັກການຈັດຕັ້ງ ແລະ ປະກາດ ການແຕ່ງຕັ້ງພະນັກງານນຳພາ

ພິທີປະກາດການປັບປຸງກົງຈັກການຈັດຕັ້ງ ແລະ ການແຕ່ງຕັ້ງບັນດາຮອງຫົວໜ້າ ຫ້ອງການ, ກົມ, ສະຖາບັນ ແລະ ພະນັກງານດຳລົງຕຳແໜ່ງ ບໍລິຫານປະເພດ 4 ແລະ 5 ຂັ້ນຫົວໜ້າພະແນກ, ຫົວໜ້າສູນ, ຮອງຫົວໜ້າ ພະແນກ ແລະ ຮອງຫົວໜ້າສູນ ພາຍໃນ ກະຊວງວິທະຍາສາດ ແລະ ເຕັກໂນໂລຊີ (ກວຕ) ໄດ້ຈັດຂຶ້ນໃນຕອນ ແລງວັນທີ 18ມິຖຸນາ 2018, ຢູ່ທີ່ຫ້ອງປະຊຸມຂອງ ສະຖາບັນການຄຸ້ມຄອງວິທະຍາສາດ ແລະ ເຕັກໂນໂລຊີ (ຫຼັກ14) ໂດຍໃຫ້ກຽດເຂົ້າຮ່ວມເປັນປະທານ ຂອງ ທ່ານ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງ ພັກ, ເລຂາຄະນະພັກກະຊວງ, ລັດຖະມົນຕີ ກວຕ.

ການປະກາດປັບປຸງການຈັດຕັ້ງ ແລະ ແຕ່ງຕັ້ງບັນດາພະນັກງານນຳພາ ຄັ້ງນີ້ກໍ່ເພື່ອເປັນການ ປັບປຸງໃຫ້ ມີຄວາມສອດຄ່ອງ, ເປັນລະບົບ, ຮອງຮັບການຂະຫຍາຍວຽກງານ ແລະ ພາລະກິດປ່ຽນແປງ ໃໝ່ຂອງພັກ, ຈັດຕັ້ງປະຕິບັດໜ້າທີ່ຂອງພັກ-ລັດ ໃຫ້ມີບາດກ້າວໃໝ່ ແລະ ເຂັ້ມແຂງເປັນກ້າວໆ ເວົ້້າລວມ, ເວົ້າສະເພາະ ກໍ່ແມ່ນ ວຽກງານວິທະຍາສາດ ແລະ ເຕັກໂນໂລຊີ.

ທ່ານ ບຸນປອນ ບົວແພງ, ຫົວໜ້າກົມຈັດຕັ້ງ ແລະ ພະນັກງານ ຂຶ້ນຜ່ານຂໍ້ຕົກລົງຂອງ ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ວ່າດ້ວຍການແຕ່ ຕັ້ງພະນັກງານນຳພາຂັ້ນຮອງກົມ ຈຳນວນ 13 ທ່ານ, ແຕ່ງຕັ້ງ ພະນັກງານດຳລົງຕຳແໜ່ງ ບໍລິຫານປະເພດ 4 ແລະ 5 ຂັ້ນຫົວໜ້າ ພະແນກ, ຫົວໜ້າສູນ, ຮອງຫົວໜ້າ ພະແນກ ແລະ ຮອງຫົວໜ້າສູນ ຈຳນວນ 158 ທ່ານ.

ໂອກາດດຽວກັນ ກໍຍັງໄດ້ມີການເຊັນມອບຮັບການຍົກຍ້າຍກົງຈັກການຈັດຕັ້ງຄື: ຍົກຍ້າຍ ສູນຫ້ອງສະໝຸດ, ກົມເຕັກໂນໂລຊີ ດິຈິຕ໋ອນ ໄປຂຶ້ນກັບ ສະຖາບັນ ການຄຸ້ມຄອງວິທະຍາສາດ ແລະ ເຕັກໂນໂລຊີ; ຍົກຍ້າຍພະແນກທ້ອງຖິ່ນ, ກົມແຜນການ ແລະ ຮ່ວມມື ໄປຂຶ້ນກັບ ກົມຈັດຕັ້ງ ແລະ ພະນັກງານ; ຍົກຍ້າຍພະແນກ ສົ່ງເສີມຄວາມກ້າວໜ້າແມ່ຍິງ, ກົມຈັດຕັ້ງ ແລະ ພະນັກງານ, ສູນຂ່າວສານວິທະຍາສາດ ແລະ ເຕັກໂນໂລຊີ ຈາກກົມເຕັກໂນໂລຊີ ດິຈິຕ໋ອນ ໄປຂຶ້ນກັບຫ້ອງການ ກະຊວງ.

ຕອນທ້າຍຂອງພິທີດັ່ງກ່າວ, ທ່ານລັດຖະມົນຕີ ຍັງໄດ້ໃຫ້ກຽດໂອ້ລົມຕໍ່ພິທີຄັ້ງນີ້ ທ່ານ ໄດ້ກ່າວສະແດງຄວາມຍ້ອງຍໍຊົມເຊີຍ ບັນດາທ່ານທີ່ຖືກແຕ່ງຕັ້ງລ້ວນ ແລ້ວແຕ່ແມ່ນບຸກຄົນທີ່ມີ ຄວາມຮູ້ຄວາມສາມາດ,ມີປະສົບການ, ມີຜົນງານໃນຫຼາຍດ້ານທີ່ຜ່ານການບຸກບືນ-ຝຶກຝົນຫຼໍ່ຫຼອມຕົນເອງ ເຮັດໃຫ້ຕົນເອງມີການເຕີບໃຫຍ່ ເຂັ້ມແຂງຂຶ້ນເປັນແຕ່ລະບາດກ້າວ ແລະ ໄດ້ຮັບຄວາມ ໄວ້ເນື້ອເຊື່ອໃຈຈາກການຈັດຕັ້ງເປັນຢ່າງດີ. ພ້ອມນ້ັນ, ທ່ານຍັງເນັ້ນໜັກໃຫ້ຜູ້ທີ່ໄດ້ຮັບການແຕ່ງຕັ້ງ ແລະ ພະນັກ ງານ-ລັດຖະກອນ ພາຍໃນ ກວຕ ຈົ່ງສືບຕໍ່ສຸມທຸກເຫື່ອແຮງ, ສະຕິປັນຍາ, ຍົກລະດັບ ຄວາມຮູ້, ຄວາມສາມາດ, ຮັກສາຄວາມສາມັກຄີ ພາຍໃນເປັນປຶກແຜ່ນ, ສືບຕໍ່ປັບ ປຸງແບບແຜນວິທີ ເຮັດວຽກໃຫ້ຖືກຕ້ອງ, ສອດຄ່ອງກັບວຽກງານຕົວຈິງ, ຮັບປະກັນໜ້າທີ່ວຽກງານໃຫ້ສຳເລັດວ່ອງໄວ, ໂປ່ງໃສ ແລະ ມີຄຸນນະພາບ, ພ້ອມກັນສຸມເຂົ້າ ໃນພາລະກິດປົກປັກຮັກສາ ແລະ ສ້າງສາປະເທດຊາດ ໃຫ້ໄດ້ຮັບຜົນງານອັນໃຫຍ່ຫຼວງກວ່າເກົ່າ.

ພິທີດ່ັງກ່າວ ມີບັນດາທ່ານຮອງລັດຖະມົນຕີ, ຄະນະພັກ, ຄະນະນໍາ ກວຕ, ແລະ ບັນດາພະນັກງານທັງໝົດ ກວຕ ເຂົ້າຮ່ວມ ພິທີດັ່ງກ່າວ 400 ກວ່າຄົນ.

 

ຮູບພາບ: ແສງທອງ ວັນນະທຳ

ຂ່າວ: ບຸນທັນ ນັນທະວົງ