ໜ້າຫຼັກ

ກ່ຽວກັບພວກເຮົາ

ຂ່າວ ແລະ ກິດຈະກຳ

ນິຕິກຳ

ສື່ ແລະ ສິ່ງພິມ

ຕິດຕໍ່ພວກເຮົາ

ຂ່າວສານ
  • Register
ວັນພະຫັດ, 14 ມີຖຸນາ 2018 00:00

ເປີດຫ້ອງກວດກາຄຸນນະພາບ ວັດສະດຸກໍ່ສ້າງ, ເຄື່ອງໃຊ້ໄຟຟ້າ ແລະ ເອເລັກໂຕຣນິກ ແຫ່ງທຳອິດຂອງ ສປປ ລາວ Featured

 

        ໂດຍອີງຕາມການຖະແຫຼງຂອງ ທ່ານ ບັນດິດ ສຈ. ບໍ່ວຽງຄຳ ວົງດາລາ ກຳມະການສູນກາງພັກ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ຄັ້ງວັນທີ 30 ເມສາ 2018 ທີ່ຜ່ານມາ, ກ່ຽວກັບການຈັດຕັ້ງປະຕິບັດ ການກວດກາຄຸນນະພາບ ວັດສະດຸກໍ່ສ້າງ, ເຄື່ອງໃຊ້ໄຟ້ຟ້າ ແລະ ເອເລັກໂຕຣນິກ ທີ່ນຳເຂົ້າ, ຈຳໜ່າຍ ແລະ ຜະລິດຢູ່ໃນ ສປປ ລາວ ຢູ່ໃນຂອບເຂດທົ່ວປະເທດ.

          ໃນວັນທີ 8 ມິຖຸນາ 2018, ກະຊວງວິທະຍາສາດ ແລະ ເຕັກໂນໂລຊີ ຈື່ງໄດ້ເປີດຫ້ອງກວດກາຄຸນນະພາບ ວັດສະດຸກໍ່ສ້າງ, ເຄື່ອງໃຊ້ໄຟຟ້າ ແລະ ເອເລັກໂຕຣນິກ ທີ່ນຳເຂົ້າ, ຈຳໜ່າຍ ແລະ ຜະລິດຢູ່ໃນ ສປປ ລາວ ປະຈຳຢູ່ດ່ານ ບໍ່ເຕນ ແຂວງຫຼວງນໍ້າທາ ເປັນແຫ່ງທຳອິດ, ໂດຍເປັນກຽດເຂົ້າຮ່ວມຂອງທ່ານ ບັນດິດ ສຈ. ບໍ່ວຽງຄຳ ວົງດາລາ ກຳມະການ ສູນກາງພັກ, ເລຂາຄະນະພັກກະຊວງ, ລັດຖະມົນຕີ ວ່າການກະຊວງ ວິທະຍາສາດ ແລະ ເຕັກໂນໂລຊີ . ມີບັນດາການນຳແຂວງຫຼວງນໍ້າທາ, ການນຳຂອງກະຊວງ, ພະແນກການຕ່າງໆ, ນັກທຸລະກິດ, ຜູ້ປະກອບກິດຈະການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

          ທ່ານ ວຽງທອງ ວົງທະວິໄລ, ຫົວໜ້າກົມມາດຕະຖານ ແລະ ວັດແທກ ກ່າວວ່າ: ປັດຈຸບັນນີ້ ສັງຄົມໄດ້ມີ ຄວາມຮຽກຮ້ອງຕ້ອງການໃຫ້ເອົາໃຈໃສ່ຕໍ່ຄຸນນະພາບ ວັດສະດຸກໍ່ສ້າງ, ເຄື່ອງໃຊ້ໄຟຟ້າ ແລະ ເອເລັກໂຕຣນິກ ທີ່ນຳໃຊ້ຢູ່ ປະເທດເຮົາ, ພໍ່ແມ່ພີ່ນ້ອງປະຊາຊົນລາວທີ່ເປັນຜູ້ຊົມໃຊ້ໄດ້ມີໜັງສືສະເໜີ ຫຼື ໂທແຈ້ງສາຍດ່ວນ ຕໍ່ສະພາ ແຫ່ງຊາດ, ບັນດາຜູ້ປະກອບການກໍ່ໄດ້ມີໜັງສືສະເໜີຫາກະຊວງວິທະຍາສາດ ແລະ ເຕັກໂນໂລຊີ, ຊື່ມວນຊົນຈຳນວນໜື່ງ ນັບທັງສື່ອອນໄລກໍ່ໄດ້ສົ່ງຂ່າວກ່ຽວກັບການຈຳໜ່າຍ ແລະ ນຳໃຊ້ວັດສະດຸກໍ່ສ້າງ, ເຄື່ອງໃຊ້ໄຟຟ້າ ແລະ ເອເລັກໂຕນິກ ຄຸນນະພາບຕໍ່າ ແລະ ບໍ່ໄດ້ຕາມມາດຕະຖານ ຢູ່ ສປປ ລາວ. ເພື່ອຕອບສະໜອງຄວາມຮຽກຮ້ອງຕ້ອງການຂອງສັງຄົມ ທີ່ກ່າວມາຂ້າງເທີງນັ້ນ ກະຊວງວິທະຍາສາດ ແລະ ເຕັກໂນໂລຊີ ໂດຍແມ່ນກົມມາດຕະຖານ ແລະ ວັດແທກ ປະສານສົມທົບກັບ ບັນດາພາກສ່ວນທີ່ກ່ຽວຂ້ອງ ກະກຽມເງື່ອນໄຂ ດ້ານນິຕິກຳ, ພັດທະນາຊັບພະຍາກອນມະນຸດ, ສ້າງວິຊາການ ແລະ ກຽມພື້ນຖານດ້ານໂຄງລ່າງ, ຫ້ອງທົດລອງ, ຫ້ອງກວດສອບເພື່ອຮອງຮັບວຽກງານກວດສອບດັ່ງກ່າວ. ພາຍຫຼັງມີຄວາມພ້ອມແລ້ວກໍ່ໄດ້ລາຍງານຂໍອະນຸມັດ ຈາກລັດຖະບານ ເພື່ອຈັດຕັ້ງປະຕິບັດການກວດກາ ຄຸນນະພາບວັດສະດຸກໍ່ສ້າງ, ເຄື່ອງໃຊ້ໄຟຟ້າ ແລະ ເອເລັກໂຕຣນິກ ໃນທົ່ວປະເທດ.

          ສຳລັບຂັ້ນຕອນວິທີກວດກາວຽກງານດັ່ງກ່າວ ແມ່ນມີຄື: ເລີ່ມຈາກການກວດກາເອກະສານຢັ້ງຢືນ ຄຸນນະພາບວັດສະດຸກໍ່ສ້າງ, ເຄື່ອງໃຊ້ໄຟຟ້າ ແລະ  ເອເລັກໂຕຣນິກທີ່ຜະລິດ ແລະ ນຳເຂົ້າມາຈຳໜ່າຍ, ເກັບຕົວຢ່າງຢູ່ແຕ່ລະດ່ານນຳເຂົ້າເພື່ອກວດຄຸນນະພາບເບື້ອງຕົ້ນ, ຫຼັງຈາກນັ້ນ ຈະໄດ້ມີການກວດກາຄຸນນະພາບຢ່າງລະອຽດ ຢູ່ຫ້ອງທົດລອງ ຂອງສູນກວດກາມາດຕະຖານປະຈຳຢູ່ດ່ານນັ້ນ ຖ້າຫາກຜ່ານມາດຕະຖານຂອງ ສປປ ລາວ ທີ່ໄດ້ກຳນົດແລ້ວນັ້ນ ຈື່ງຈະໄດ້ມີການອອກໃບຢັ້ງຢືນ ແລ້ວຈື່ງສາມາດນຳເຂົ້າໄດ້. ພ້ອມກັນນັ້ນ, ກໍ່ຍັງຈະດຳເນີນກວດກາຄຸນນະພາບວັດສະດຸກໍ່ສ້າງ, ເຄື່ອງໃຊ້ໄຟຟ້າ ແລະ  ເອເລັກໂຕຣນິກ ຢູ່ຕາມຫ້າງຮ້ານ, ໂຮງຈັກໂຮງງານ, ບ່ອນຈຳໜ່າຍ ເປັນແຕ່ລະໄລຍະ ອີກດ້ວຍ. ພ້ອມດຽວກັນນັ້ນ, ຍັງມີລົດສາຍດ່ວນ (Mobile lab) ສຳລັບກວດສອບເຄື່ອນທີ່ ແລະ ເມື່ອມີສາຍດ່ວນຮັບການແຈ້ງຂໍ້ມູນຈາກປະຊາຊົນ, ຜູ້ຊົມໃຊ້ ຫຼື ຜູ້ປະກອບການ. ໃນກໍລະນີທ່ານຕ້ອງການ ໂທແຈ້ງຂ່າວກ່ຽວກັບບັນຫາວັດສະດຸກໍ່ສ້າງ, ເຄື່ອງໃຊ້ໄຟຟ້າ ແລະ  ເອເລັກໂຕຣນິກ ທີ່ບໍ່ໄດ້ມາດຕະຖານ ສາມາດແຈ້ງສາຍດ່ວນ ໂທ: 1513.

          ທ່ານ ຍັງໄດ້ກ່າວຕື່ມວ່າ: ໃນນາມອົງການທີ່ຄຸ້ມຄອງ, ກວດກາຄຸນນະພາບ ແລະ ມາດຕະຖານດັ່ງກ່າວ ພວກຂ້າພະເຈົ້າຈະດຳເນີນວຽກງານດັ່ງກ່າວນີ້ ດ້ວຍຄວາມໂປ່ງໃສ, ວ່ອງໄວ ແລະ ບໍລິການຮັບໃຊ້ປະຊາຊົນດ້ວຍຄວາມຮັບຜິດຊອບສູງ ສະນັ້ນ, ຈື່ງຮຽກຮ້ອງມາຍັງບັນດາກະຊວງ, ອົງການທີ່ກ່ຽວຂ້ອງ, ຕະຫຼອດເຖີງບັນດາຜູ້ປະກອບການ, ບໍລິສັດ, ຫ້າງຮ້ານ ແລະ ຜູ້ຊົມໃຊ້ ໃນຂອບເຂດທົ່ວປະເທດຈົ່ງໃຫ້ຄວາມຮ່ວມມື ແລະ ຊຸກຍູ້ການປະຕິບັດວຽກງານດັ່ງກ່າວ ໃຫ້ໄດ້ຮັບຜົນດີ ທັງເປັນການປະກອບສ່ວນຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2016-2020) ຂອງ ສປປ ລາວ ໃຫ້ປະກົດຜົນເປັນຈິງ, ປະກອບສ່ວນສ້າງສາ ແລະ ພັດທະນາ ເສດຖະກິດ-ສັງຄົມ ຂອງປະເທດເຮົາ, ເຮັດໃຫ້ປະເທດຊາດມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມສາມັກຄີປອງດອງ, ປະຊາທິປະໄຕ, ຍຸດຕິທຳ ແລະ ສີວິໄລ.

 

ພາບ: ທ. ອໍລະຊຸນ ມະນີ 

ຂ່າວ: ນັກຂ່າວ ກວຕ