ຂ່າວສານ
  • Register
ວັນຈັນ, 30 ເມສາ 2018 00:00

ພິທີປະກາດການແຕ່ງຕັ້ງຫົວໜ້າຫ້ອງການ, ກົມ ແລະ ສະຖາບັນພາຍໃນ ກະຊວງ ວິທະຍາສາດ ແລະ ເຕັກໂນໂລຊີ Featured

 

    ເພື່ອເປັນການຈັດຕັ້ງປະຕິບັດໜ້າທີ່ຂອງພັກ-ລັດ ແລະ ເຮັດໃຫ້ພາລະກິດປ່ຽນແປງໃໝ່ຂອງພັກມີບາດກ້າວໃໝ່ ເຂັ້ມແຂງເປັນກ້າວໆເວົ້້າລວມ, ເວົ້າສະເພາະກໍແມ່ນອິງຕາມຄວາມຮຽກຮ້ອງຕ້ອງການຂອງໜ້າທີ່ວຽກງານ ກະຊວງວິທະຍາ ສາດ ແລະ ເຕັກໂນໂລຊີ (ກວຕ), ໃນຕອນແລງວັນທີ 26 ເມສາ 2014 ກວຕ ຈຶ່ງໄດ້ຈັດພິທີປະກາດການແຕ່ງຕັ້ງຫົວໜ້າຫ້ອງການ, ກົມ ແລະ ສະຖາບັນພາຍໃນ ກວຕ ທີ່ຫ້ອງປະຊຸມຂອງ ສະຖາບັນການຄຸ້ມຄອງວິທະຍາສາດ ແລະ ເຕັກໂນໂລຊີ (ຫຼັກ14) ໂດຍໃຫ້ກຽດເຂົ້າຮ່ວມຂອງທ່ານ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ, ມີບັນດາທ່ານຮອງລັດຖະມົນຕີ, ບັນດາຄະນະພັກ, ຄະນະນຳຂອງກະຊວງ, ມີທ່ານ ນາງ ບຸດສະດີ ທະນະເມືອງ, ຄະນະພັກ, ຫົວໜ້າກົມຄຸ້ມຄອງພະນັກງານ, ຄະນະຈັດຕັ້ງສູນກາງພັກ ແລະ ບັນດາພະນັກງານຫຼັກແຫຼ່ງ ກວຕ ເຂົ້າຮ່ວມ

      ໃນພິທີທ່ານ ນາງ ບຸດສະດີ ທະນະເມືອງ, ໄດ້ຂຶ້ນຜ່ານດຳລັດຂອງນາຍົກລັດຖະມົນຕີ ວ່າດ້ວຍການບັນດາຫົວໜ້າຫ້ອງການ, ກົມ ແລະ ສະຖາບັນພາຍໃນ ກວຕ ທັງໝົດ 5 ທ່ານຄື: ແຕ່ງຕັ້ງ ບຸນປອນ ບົວແພງ ເປັນຫົວໜ້າກົມຈັດຕັ້ງ ແລະ ພະນັກງານ ຕາມດຳລັດເລກທີ 160/ນຍ ລົງວັນທີ 11 ເມສາ 2018, ແຕ່ງຕັ້ງທ່ານ ພຸດທະສັກ ວິຈິດຕຣາ ເປັນຫົວໜ້າຫ້ອງການ ຕາມດຳລັດເລກທີ 161/ນຍ ລົງວັນທີ 11 ເມສາ 2018, ແຕ່ງຕັ້ງທ່ານ ວຽງທອງ ວົງທະວິໄລ ເປັນຫົວໜ້າກົມມາດຕະຖານ ແລະ ວັດແທກ ຕາມດຳລັດເລກທີ 162/ນຍ ລົງວັນທີ 11 ເມສາ 2018, ແຕ່ງຕັ້ງທ່ານ ປອ ຄຳເພັດ ວົງດາລາ ເປັນຫົວໜ້າກົມແຜນການ ແລະ ຮ່ວມມື ຕາມດຳລັດເລກທີ 163/ນຍ ລົງວັນທີ 11 ເມສາ 2018 ແລະ ແຕ່ງຕັ້ງທ່ານ ພິມພາ ອຸດທະຈັກ ເປັນຫົວໜ້າສະຖາບັນການຄຸ້ມຄອງ ວິທະຍາສາດ ແລະ ເຕັກໂນໂລຊີ ຕາມດຳລັດເລກທີ 164/ນຍ ລົງວັນທີ 11 ເມສາ 2018

      ໃນຕອນທ້າຍ, ທ່ານ ບັນດິດ ສຈ. ບໍ່ວຽງຄຳ  ໄດ້ໃຫ້ກຽດໂອ້ລົມຕໍ່ພິທີ, ກ່ອນອື່ນ ທ່ານໄດ້ກ່າວຍ້ອງຍໍຊົມເຊີຍ ບັນດາທ່ານທີ່ຖືກແຕ່ງຕັ້ງ ເຊິ່ງລ້ວນແລ້ວແຕ່ແມ່ນບຸກຄົນ ທີ່ມີຄວາມຮູ້ຄວາມສາມາດ, ມີປະສົບການ, ມີຜົນງານໃນຫຼາຍດ້ານ, ຜ່ານການບຸກບືນ-ຝຶກຝົນຫຼໍ່ຫຼອມຕົນເອງ ເຮັດໃຫ້ຕົນເອງມີການ ເຕີບໃຫຍ່ເຂັ້ມແຂງຂຶ້ນເປັນແຕ່ລະບາດກ້າວ ແລະ ໄດ້ຮັບຄວາມ ໄວ້ເນື້ອເຊື່ອໃຈ ຈາກການຈັດຕັ້ງເປັນຢ່າງດີ. ພ້ອມນັ້ນ, ທ່ານໄດ້ເນັ້ນໜັກໃຫ້ ຜູ້ທີ່ໄດ້ຮັບການແຕ່ງຕັ້ງ ແລະ ພະນັກງານ-ລັດຖະກອນ ພາຍໃນ ກວຕ ທັງໝົດຈົ່ງສືບຕໍ່ສຸມທຸກເຫື່ອແຮງ, ສະຕິປັນຍາ, ຍົກລະດັບຄວາມ, ຄວາມຮູ້ຄວາມສາມາດ, ຮັກສາມັກຄີ ເປັນປຶກແຜ່ນແໜ້ນໜາ, ສືບຕໍ່ປັບປຸງແບບແຜນວິທີເຮັດວຽກ ໃຫ້ຖືກຕ້ອງ, ສອດຄ່ອງຕົວຈິງ, ວ່ອງໄວ, ໂປ່ງໃສ, ຮັບປະກັນໄດ້ ຄຸນນະພາບ ແລະ ປະສິດທິຜົນຂອງວຽກງານ ພ້ອມກັນສຸມເຂົ້າໃນພາລະກິດປົກປັກຮັກສາ ແລະ ສ້າງສາປະເທດຊາດ ເວົ້າລວມ, ເວົ້າສະເພາະ ແມ່ນວຽກງານໃນຂົງເຂດທີ່ຕົນເອງຮັບຜິດຊອບ ກໍຄືວຽກງານວິທະຍາສາດ ແລະ ເຕັກໂນໂລຊີ ໃຫ້ໄດ້ຮັບໝາກຜົນຍິ່ງໃຫຍ່ກວ່າເກົ່າ.

ຮູບພາບ: ບິນລີ້ ສີສຸລາດ

ບົດຂ່າວ: ບຸນທັນ ນັນທະວົງ