ໜ້າຫຼັກ

ກ່ຽວກັບພວກເຮົາ

ຂ່າວ ແລະ ກິດຈະກຳ

ນິຕິກຳ

ສື່ ແລະ ສິ່ງພິມ

ຕິດຕໍ່ພວກເຮົາ

ຂ່າວສານ
  • Register
ວັນຈັນ, 04 ມີນາ 2019 00:00

ເປີດຫ້ອງກວດສອບຄຸນນະພາບເຄື່ອງໃຊ້ໄຟຟ້າ ແລະ ເຄື່ອງເອເລັກໂຕຣນິກ ຢ່າງເປັນທາງການ Featured

ນັບວ່າເປັນການຄອງຄອຍທີ່ມີຜົນສໍາເລັດໄປອີກຂັ້ນ ສໍາລັບໂຄງການສ້າງຫ້ອງກວດສອບຄຸນນະພາບເຄື່ອງໃຊ້ໄຟຟ້າ ແລະ ເຄື່ອງເອເລັກໂຕຣນິກ. ຫຼ້າສຸດໂຄງການດັ່ງກ່າວກໍ່ໄດ້ເປີດຢ່າງເປັນທາງການຢູ່ທີ່ສາງສິນຄ້າທ່ານາແລ້ງ ເມືອງຫາດຊາຍຟອງ ນະຄອນຫຼວງວຽງຈັນ.

        

  ທ່ານ ວຽງທອງ ວົງທະວິໄລ ຫົວໜ້າກົມມາດຕະຖານ ແລະ ວັດແທກ ກະຊວງວິທະຍາສາດ ແລະ ເຕັກໂນໂລຊີ ກ່າວວ່າ: ຈຸດປະສົງຂອງການເປີດຫ້ອງກວດສອບຄຸນະພາບເຄື່ອງໃຊ້ໄຟຟ້າ ແລະ ເຄື່ອງເອເລັກໂຕຣນິກໃນຄັ້ງນີ້ ເພື່ອສ້າງຄວາມເຂັ້ມແຂງໃຫ້ແກ່ພື້ນຖານຄຸນນະພາບແຫ່ງຊາດກໍຄືສ້າງຄວາມເຊື່ອໝັ້ນໃຫ້ກັບຜູ້ຊົມໃຊ້ ໂດຍຜ່ານການກວດກາຢັ້ງຢືນຈາກພວກເຮົາ, ທັງເປັນການສະກັດກັ້ນການນໍາເຂົ້າຜະລິດຕະພັນ ແລະ ສິນຄ້າທີ່ບໍ່ໄດ້ຄຸນນະພາບ ຫຼື ບໍ່ສອດຄ່ອງກັບມາດຕະຖານແຫ່ງຊາດ, ພາກພື້ນ ແລະ ສາກົນ.

          ທ່ານ ບຸນໂຮມ ພານຸວົງ ຫົວໜ້າສູນຢັ້ງຢືນມາດຕະຖານ ແລະ ກວດກາຄຸນນະພາບແຫ່ງຊາດ ໃຫ້ສໍາພາດວ່າ: ໂຄງການດັ່ງກ່າວແມ່ນໄດ້ເລີ່ມປະຕິບັດນັບແຕ່ໄດ້ມີພິທີເຊັນສັນຍາໃນເດືອນພະຈິກ 2017 ເປັນຕົ້ນມາ, ເຊິ່ງໄດ້ຜ່ານການຈັດຕັ້ງປະຕິບັດທາງດ້ານນິຕິກຳ, ລະບຽບ-ຫຼັກການຕ່າງໆ, ສ້າງຫ້ອງກວດສອບ ແລະ ໄດ້ນໍາເຂົ້າອຸປະກອນກວດສອບທີ່ທັນສະໄໝຈາກຕ່າງປະເທດ ລວມທັງຝຶກອົບຮົມພະນັກງານຈົນມີຄວາມຊ່ຽວຊານ ແລະ ອື່ນໆສໍາເລັດ ຈຶ່ງໄດ້ມີພິທີເປີດຢ່າງເປັນທາງການຢູ່ນະຄອນຫຼວງວຽງຈັນເປັນແຫ່ງທໍາອິດ ຖັດຈາກນັ້ນຈຶ່ງຈະຂະຫຍາຍໄປເປີດຢູ່ແຕ່ລະດ່ານໃນທົ່ວປະເທດ.

ທ່ານໄດ້ໃຫ້ຮູ້ຕື່ມວ່າ: ໃນການກວດສອບແມ່ນ ອີງຕາມຄຸນລັກສະນະທີ່ສໍາຄັນໃນການກຳນົດໃນມາດຕະຖານ ເຊັ່ນ: ທົດສອບຄວາມທົນຕໍແຮງໄຟ, ທົດສອບຄວາມຕ້ານຂອງສະນວນ, ທົດສອບກະແສໄຟຮົ່ວ, ທົດສອບທາງຜ່ານລົງດິນ ແລະ ທົດສອບຄວາມສອດຄ່ອງຂອງສະຫຼາກ. ໂດຍໃນໄລຍະທໍາອິດເຮົາຈະເລີ່ມກວດສິນຄ້າປະເພດເຄື່ອງໃຊ້ໄຟຟ້າພາຍໃນຄົວເຮືອນກ່ອນ ເຊິ່ງປະກອບມີ: ການກວດພາຍໃນສາງກ່ອນນໍາເຂົ້າຈໍາໜ່າຍ ແລະ ກວດຢູ່ຕາມຕະຫຼາດທົ່ວໄປ ໃນຈໍານວນ 49 ລາຍການຕາມທີ່ລະບຸໄວ້ໃນຂໍ້ຕົກລົງວ່າດ້ວຍການຄຸ້ມຄອງຄວາມປອດໄພຂອງອຸປະກອນເຄື່ອງໃຊ້ໄຟຟ້າ ແລະ ເອເລັກໂຕຣນິກ ຢູ່ ສປປ ລາວ.  ເຊິ່ງພາຍຫຼັງກວດສອບແລ້ວພວກເຮົາຈະມີການຕິດສະຕິກເກີໃສ່ອຸປະກອນນັ້ນທຸກຄັ້ງ ເພື່ອໃຫ້ຜູ້ໃຊ້ສາມາດກວດສອບໄດ້ຜ່ານຄິວອາໂຄດ ແລະ ໝັ້ນໃຈວ່າເຄື່ອງໃຊ້ໄຟຟ້າຊະນິດນີ້ມີມາດຕະຖານ ແລະ ໄດ້ຄຸນນະພາບແທ້.

          ປັດຈຸບັນ, ພວກເຮົາກໍາລັງເກັບກໍາຂໍ້ມູນເຄື່ອງໃຊ້ໄຟຟ້າ ແລະ ເອເລັກໂຕຣນິກທີ່ຜູ້ປະກອບການ ນໍາເຂົ້າມາຈໍາໜ່າຍເພື່ອເປັນຂໍ້ມູນພື້ນຖານໃນການວິເຄາະ ລວມທັງຮູ້ໄດ້ເຖິງຈໍານວນສິນຄ້າທີ່ນໍາເຂົ້າມາ ຄາດວ່າຈະມີຜູ້ປະກອບການນໍາເຂົ້າສິນຄ້າປະເພດນີ້ເຂົ້າມາຈໍາໜ່າຍຫຼາຍສົມຄວນ ໂດຍພວກເຮົາກໍ່ຈະໄດ້ມີການກວດສອບທຸກຄັ້ງທີ່ມີການນໍາເຂົ້າກ່ອນໄປຈໍາໜ່າຍ. ໃນກໍລະນີ ປະຊາຊົນພົບເຫັນເຄື່ອງໃຊ້ໄຟຟ້າ ແລະ ເຄື່ອງເອເລັກໂຕຣນິກທີ່ບໍ່ໄດ້ມາດຕະຖານແມ່ນສາມາດແຈ້ງຜ່ານສາຍດ່ວນຂອງພວກເຮົາທີ່ເບີໂທ: 1513.

          ພິທີເປີດຫ້ອງກວດສອບຄຸນນະພາບເຄື່ອງໃຊ້ໄຟຟ້າ ແລະ ເຄື່ອງເອເລັກໂຕຣນິກ ຈັດຂຶ້ນໃນຕອນເຊົ້າວັນທີ 26 ກຸມພາ 2019 ຜ່ານມາ ໃຫ້ກຽດເຂົ້າຮ່ວມ ແລະ ຕັດແຖບຜ້າຂອງທ່ານ ບັນດິດ ສຈ ບໍ່ວຽງຄຳ ວົງດາລາ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ມີບັນດາທ່ານຮອງລັດຖະມົນຕີ, ຫົວໜ້າກົມ, ຜູ້ຕາງໜ້າຈາກກະຊວງທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

ຮູບພາບ ແລະ ບົດຂ່າວ: ທ ພຸດທະຈັນ ຊັບທະວີ