ໜ້າຫຼັກ

ກ່ຽວກັບພວກເຮົາ

ຂ່າວ ແລະ ກິດຈະກຳ

ນິຕິກຳ

ສື່ ແລະ ສິ່ງພິມ

ຕິດຕໍ່ພວກເຮົາ

ຂ່າວສານ
  • Register
ວັນອັງຄານ, 29 ມັງກອນ 2019 00:00

ພິທີເຊັນສັນຍາ ກ່ຽວກັບ ການຮ່ວມມືສ້າງຫ້ອງກສວດສອບມາດຕະຖານ ແລະ ຢັ້ງຢືນມາດຕະຖານ ຂອງ ອຸປະກອນພິເສດ Featured

ວັນທີ 28 ມັງກອນ 2019 ກົມມາດຕະຖານ ແລະ ວັດແທກ ໄດ້ມີການຈັດພິທີເຊັນສັນຍາ ກ່ຽວກັບ ການຮ່ວມມືສ້າງຫ້ອງກສວດສອບມາດຕະຖານ ແລະ ຢັ້ງຢືນມາດຕະຖານ ຂອງ ອຸປະກອນພິເສດ, ໄດ້ຖືກຈັດຂຶ້ນທີ່ ໂຮງແຮມດອນຈັນພາເລດ ນະຄອນຫຼວງວຽງຈັນ, ທີ່ໃຫ້ກຽດເປັນປະທານໂດຍ ທ່ານ ບັນດິດ ສຈ ບໍ່ວຽງຄຳ ວົງດາລາ ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ.

ໃຫ້ກຽດ ພິທີຂຶ້ນເຊັນບົດບັນທຶກ ໂດຍທ່ານ ວຽງທອງ ວົງທະວິໄລ ຫົວໜ້າກົມມາດຕະຖານ ແລະ ວັດແທກ, ທ່ານ ບຸນໂຮມ ພານຸວົງ ຫົວໜ້າສູນຢັ້ງຢືນມາດຕະຖານ ແລະ ກວດກາຄຸນນະພາບແຫ່ງຊາດ ລະຫວ່າງ ທ່ານ ເສີນຫົງຫາຍ ປະທານ ບໍລິສັດ ດີແລ້ວ ຈຳກັດຜູ້ດຽວ.

        ຈຸດປະສົງໃນການຈັດພິທີເຊັນສັນຍາ ໃນມື້ນີ້ເພື່ອເປັນການເຊີນ: ບັນດາທ່ານສື່ມວນຊົນ, ຂະແໜງການທັງພາກລັດ ແລະ ເອກະຊົນ ທີ່ເຂົ້າຮ່ວມງານພິທີເຊັນສັນຍາ ໃນຄັ້ງນີ້ໄດ້ຊາບວ່າ:

  1. ກົມມາດຕະຖານ ແລະ ວັດແທກ ແມ່ນ ໜ່ວຍງານຂອງລັດທີ່ຂຶ້ນກັບກະຊວງວິທະຍາສາດ ແລະ ເຕັກໂນໂລຊີ ແລະ ທັງເປັນໜ່ວຍງານທີ່ຖືກມອບໝາຍໃຫ້ດຳເນີນ ການຄຸ້ມຄອງ, ທົດສອບ ການຮ່ວມມືສ້າງຫ້ອງກວດສອບມາດຕະຖານ ຂອງອຸປະກອນພິເສດ ຕາມມາດຕະຖານແຫ່ງຊາດ, ມາດຕະຖານສາກົນ ແລະ ລະບຽບການເຕັກນິກ.
  2. ເພື່ອຕອບສະໜອງ ຄວາມຮຽກຮ້ອງຕ້ອງການຂອງສັງຄົມໃນ ການແກ້ໄຂປະກົດການຫຍໍ້ທໍ້ ແລະ ປົກປ້ອງຜູ້ບໍລິໂພກ ຢູ່ ໃນ ສປປ ລາວ ໃຫ້ຮັບປະກັນຄຸນນະພາບ ແລະ ຖືກຕ້ອງຕາມມາດຕະຖານ ແຫ່ງຊາດ ແລະ ມາດຕະຖານສາກົນ.
  3. ການຈັດຕັ້ງປະຕິບັດວຽກງານດັ່ງກ່າວນີ້ເປັນ ການປະກອບສ່ວນ ຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມ 05 ປີ ຄັ້ງທີ VIII (2016-2020) ຂອງ ສປປ ລາວ ໃຫ້ປະກົດຜົນເປັນຈິງ.
  4. ທັງເປັນການສ້າງຄວາມໝັ້ນໃຈໃຫ້ແກ່ ຜູ້ບໍລິໂພກ, ໃຫ້ມີຄວາມປອດໄພຈາກສິ່ງອັນຕະລາຍທີ່ອາດເກີດຂຶ້ນ.

ທີ່ກ່າວມາຂ້າງເທິງນັ້ນ ກະຊວງວິທະຍາສາດ ແລະ ເຕັກໂນໂລຊີ ຈຶ່ງໄດ້ຊີ້ນໍາໃຫ້ກົມມາດຕະຖານ ແລະ ວັດແທກ ປະສານສົມທົບກັບບັນດາພາກສ່ວນທີ່ກ່ຽວຂ້ອງກະກຽມເງື່ອນໄຂດັ່ງນີ້:

  • ດ້ານນິຕິກຳ ແມ່ນໃຫ້ມີການສ້າງລະບຽບການ, ມາດຕະຖານໃນການກໍານົດວິທີການກວດສອບ, ການສ້າງລະບົບການກວດສອບມາດຕະຖານ ຂອງອຸປະກອນພິເສດ.
  • ການພັດທະນາຊັບພະຍາກອນມະນຸດ ແລະ ສ້າງວິຊາການ ໄດ້ມີການຈັດຝຶກອົບຮົມກ່ຽວກັບວຽກງານດັ່ງກ່າວ ແລະ ເຜີຍແຜ່ໃຫ້ພາກລັດ ແລະ ເອກະຊົນຮັບຊາບ.
  • ມີການຈັດຫາວິຊາການ, ອຸປະກອນ ແລະ ຄູ່ມືການກວດສອບ ເພື່ອຮັບປະກັນແກ່ວຽກງານດັ່ງກ່າວ.

ເພື່ອຮອງຮັບວຽກງານກວດສອບດັ່ງກ່າວ. ສູນ ຢັ້ງຢືນມາດຕະຖານ ແລະ ກວດກາມາດຕະ ຖານແຫ່ງຊາດ ຂອງ ກົມມາດຕະຖານ ແລະ ວັດແທກ ຈະໄດ້ດໍາເນີນການສ້າງຫ້ອງກວດສອບມາດຕະຖານ ຂອງອຸປະກອນພິເສດຕາມມາດຕະຖານສາກົນ.

         ການກວດກາດັ່ງກ່າວຈະໄດ້ດຳເນີນເລີ່ມຈາກ ການກວດກາມາດຕະຖານ ຂອງອຸປະກອນພິເສດ ທີ່ເປັນລະບົບ ຄຸນນະພາບເບື້ອງຕົ້ນ, ຫຼັງຈາກນັ້ນ ຈະໄດ້ມີການກວດຄຸນນະພາບລະອຽດ ໂດຍຜ່ານການປະເມີນຈາກຜູ້ປະເມີນສະເພາະດ້ານ ຂອງ ສູນ ຢັ້ງຢືນມາດຕະຖານ ແລະ ກວດກາຄຸນນະພາບ ແຫ່ງຊາດ.