ໜ້າຫຼັກ

ກ່ຽວກັບພວກເຮົາ

ຂ່າວ ແລະ ກິດຈະກຳ

ນິຕິກຳ

ສື່ ແລະ ສິ່ງພິມ

ຕິດຕໍ່ພວກເຮົາ

ຂ່າວສານ
  • Register
ວັນພຸດ, 02 ມັງກອນ 2019 00:00

ກອງປະຊຸມ ປຶກສາ​ຫາລື ​ແລະ ປະກອບ​ຄໍາ​ເຫັນ​ໃສ່​ ຮ່າງຂໍ້ຕົກລົງວ່າດ້ວຍ ການປົກປ້ອງຜູ້ຊົມໃຊ້ຜະລິດຕະພັນສິນຄ້າ ແລະ ການບໍລິການ ທາງດ້ານມາດຕະຖານ ແລະ ການວັດແທກ

ໃນວັນທີ 25 ທັນວາ 2018 ພະແນກຄົ້ນຄ້ວາ ແລະ ພັດທະນາ, ກົມມາດຕະຖານ ແລະ ວັດແທກ, ກະຊວງວິທະຍາສາດ ແລະ ເຕັກໂນໂລຊີ ໄດ້ຈັດກອງປະຊຸມ ປຶກສາ​ຫາລື ​ແລະ ປະກອບ​ຄໍາ​ເຫັນ​ໃສ່​ ຮ່າງຂໍ້ຕົກລົງວ່າດ້ວຍ ການປົກປ້ອງຜູ້ຊົມໃຊ້ຜະລິດຕະພັນສິນຄ້າ ແລະ ການບໍລິການ ທາງດ້ານມາດຕະຖານ ແລະ ການວັດແທກ ຂື້ນທີ່ຫ້ອງປະຊຸມ ກວຕ

ໃຫ້ກຽດເປັນປະທານໂດຍ ທ່ານ ວຽງທອງ ວົງທະວິໄລ ຫົວໜ້າ ກົມມາດຕະຖານ ແລະ ວັດແທກ ແລະ ມີຜູ້ຕາງໜ້າເຂົ້າຮ່ວມຈາກ ພະແນກ, ສູນ, ກົມ, ສະຖາບັນ ພາຍໃນກະຊວງວິທະຍາສາດ ແລະ ເຕັກໂນໂລຊີ, ບັນດາ ກະຊວງກ່ຽວຂ້ອງ ແລະ ຜູ້ປະກອບການພາກທຸລະກິດ ທັງໝົດຈຳນວນ 30 ກ່ວາຄົນ.

 ທ່ານ ຫົວໜ້າ ກົມມາດຕະຖານ ແລະ ວັດແທກ ໄດ້ກ່າວວ່າ: ວຽກງານປົກປ້ອງຜູ້ຊົມໃຊ້ຂອງລັດ ກໍ່ແມ່ນວຽກງານໜຶ່ງ ທີ່ມີບົດບາດສໍາຄັນ ໃນການສ້າງຄວາມເຊື່ອຖືໃຫ້ແກ່ຜູ້ຜະລິດ, ຈໍາໜ່າຍ, ບໍລິການ, ພ້ອມດຽວກັນນັ້ນ ກໍມີບົດບາດສໍາຄັນໃນການສ້າງຄວາມໝັ້ນໃຈໃຫ້ແກ່ຜູ້ຊົມໃຊ້ ເຊັ່ນດຽວກັນ. ດັ່ງນັ້ນ ວຽກງານປົກປ້ອງຜູ້ຊົມໃຊ້ ຈຶ່ງກາຍເປັນວຽກງານໜຶ່ງທີ່ມີຄວາມໝາຍ ຄວາມສໍາຄັນຢູ່ໃນສັງຄົມ ໃນການຄຸ້ມຄອງ ການນໍາໃຊ້ ຜະລິດຕະພັນສິນຄ້າ ແລະ ການບໍລິການ ໃຫ້ມີຄວາມເປັນລະບຽບຮຽບຮ້ອຍ, ປອດໄພ ແລະ ຍຸຕິທໍາ ຢູ່ໃນສັງຄົມ.

ທ່ານຍັງໄດ້ກ່າວຕຶ່ມອີກວ່າ ການປົກປ້ອງຜູ້ຊົມໃຊ້ວຽກງານມາດຕະຖານ ແລະ ວັດແທກ, ເນື້ອແທ້ ກໍແມ່ນການຜັນຂະຫຍາຍກົດໝາຍປົກປ້ອງຜູ້ຊົມໃຊ້ ເລກທີ 02/ສພຊ, ລົງວັນທີ 30 ມີຖຸນາ 2010 ເຂົ້າສູ່ການຈັດຕັ້ງປະຕິບັດ ຕາມຂອບເຂດຄວາມຮັບຜິດຊອບຂອງແຕ່ລະວຽກງານໃນຂະແໜງການ. ຊຶ່ງໃນນີ້ວຽກງານມາດຕະຖານ ແລະ ວັດແທກ ກໍ່ແມ່ນໜ້າວຽກ ທີ່ສໍາຄັນ ທີ່ມີລັກສະນະຕັດສິນເຖິງຄຸນນະພາບ ຂອງການຜະລິດ, ການຄ້າ ແລະ ການບໍລິການ ຊຶ່ງແມ່ນໜ້າທີ່ຄວາມຮັບຜິດຊອບຈະຕ້ອງໄດ້ມີ ການຕິດຕາມ, ກວດກາ, ແນະນໍາ ແລະ ໃນເມື່ອເກີດມີກໍລະນີ ຂໍ້ຂັດແຍ່ງເກີດຂຶ້ນ ລະຫວ່າງ ຜູ້ສະໜອງ ແລະ ຜູ້ຊົມໃຊ້ ກໍຈະຕ້ອງໄດ້ຮັບ ການແກ້ໄຂ ຢ່າງຖືກຕ້ອງ ແລະ ຍຸຕິທໍາ. ດັ່ງນັ້ນ ກົມມາດຕະຖານ ແລະ ວັດແທກ ຈຶ່ງໄດ້ຮ່າງຂໍ້ຕົກລົງ “ວ່າດ້ວຍ ການປົກປ້ອງຜູ້ຊົມໃຊ້ ຜະລິດຕະພັນສິນຄ້າ ແລະ ການບໍລິການ ທາງດ້ານມາດຕະຖານ ແລະ ການວັດແທກ” ນີ້ຂຶ້ນ ເຊີ່ງປະກອບມີ: 8 ໝວດ, 29 ມາດຕາ.

ທ່ານປະທານກອງປະຊຸມ ກໍ່ໄດ້ເປີດໃຫ້ບັນດາທ່ານທີ່ເຂົ້າຮ່ວມ ຊ່ວຍພິຈາລະນາ, ປຶກສາຫາລື ແລະ ແລກປ່ຽນຄໍາຄິດເຫັນ ຢ່າງກົງໄປກົງມາ ເພື່ອເປັນການປະກອບໃສ່ ຮ່າງຂໍ້ຕົກລົງສະບັບນີ້ ມີຄວາມອຸດົມສົມບູນຂຶ້ນຕື່ມ.

ຮູບພາບ ແລະ ບົດຂ່າວ: ທ ພຸດທະຈັນ ຊັບທະວີ