ໜ້າຫຼັກ

ກ່ຽວກັບພວກເຮົາ

ຂ່າວ ແລະ ກິດຈະກຳ

ນິຕິກຳ

ສື່ ແລະ ສິ່ງພິມ

ຕິດຕໍ່ພວກເຮົາ

ຂ່າວສານ
  • Register
ວັນພະຫັດ, 29 ພະຈິກ 2018 00:00

ຈະຮ່ວມມືສ້າງຫ້ອງກວດສອບ ແລະ ຢັ້ງຢືນມາດຕະຖານ ອຸປະກອນໄຟຟ້າພິເສດ

ວັນທີ 27 ພະຈິກ 2018 ທີ່ ຫ້ອງປະຊຸມ ກະຊວງວິທະຍາສາດ ແລະ ເຕັກໂນໂລຊີ ຊັ້ນ 4 ໄດ້ມີການຈັດພິທີເຊັນບົດບັນທຶກຄວາມເຂົ້າໃຈ (MOU) ກ່ຽວກັບການຮ່ວມມືສ້າງຫ້ອງກວດສອບ ແລະ ຢັ້ງຢືນມາດຕະຖານ ອຸປະກອນໄຟຟ້າພິເສດ ລະຫ່ວາງ ກົມມາດຕະຖານ ແລະ ວັດແທກ ແລະ ບໍລິສັດ ດີແລ້ວ ຈຳກັດຜູ້ດຽວ, ໃຫ້ກຽດເປັນປະທ່ານໂດຍ ທ່ານ ບັນດິດ ສຈ ບໍ່ວຽງຄຳ ວົງດາລາ ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງ ວິທະຍາສາດ ແລະ ເຕັກໂນໂລຊີ, ທັງເປັນປະທານ ສະພາວິທະຍາສາດແຫ່ງຊາດ, ຂຶ້ນເຊັນບົດບັນທຶກ ໂດຍທ່ານ ວຽງທອງ ວົງທະວິໄລ ຫົວໜ້າກົມມາດຕະຖານ ແລະ ວັດແທກ, ທ່ານ ບຸນໂຮມ ພານຸວົງ ຫົວໜ້າສູນຢັ້ງຢືນມາດຕະຖານ ແລະ ກວດກາຄຸນນະພາບແຫ່ງຊາດ ແລະ ທ່ານ ນາງ ບຸນມີ ພຸດທະປານ ຜູ້ຈັດການບໍລິສັດ ດີແລ້ວ ຈຳກັດຜູ້ດຽວ.

         ທ່ານ ຫົວໜ້າ ກົມມາດຕະຖານ ແລະ ວັດແທກ ໄດ້ກ່າວຈຸດປະສົງໃນການຈັດພິທີເຊັນບົດບັນທຶກຄວາມເຂົ້າໃຈ (MOU) ໃນມື້ນີ້ວ່າ: ກົມມາດຕະຖານ ແລະ ວັດແທກ ແມ່ນ ໜ່ວຍງານຂອງລັດທີ່ຂຶ້ນກັບກະຊວງວິທະຍາສາດ ແລະ ເຕັກໂນໂລຊີ ແລະ ທັງເປັນໜ່ວຍງານທີ່ຖືກມອບໝາຍໃຫ້ດຳເນີນ ການຄຸ້ມຄອງ, ທົດສອບ, ກວດສອບ ແລະ ຢັ້ງຢືນມາດຕະຖານ ອຸປະກອນໄຟຟ້າພິເສດ; ເພື່ອຕອບສະໜອງ ຄວາມຮຽກຮ້ອງຕ້ອງການຂອງສັງຄົມໃນການແກ້ໄຂປະກົດການຫຍໍ້ທໍ້ ແລະ ປົກປ້ອງຜູ້ບໍລິໂພກ ຢູ່ ໃນ ສປປ ລາວ ໃຫ້ຮັບປະກັນຄຸນນະພາບ ແລະ ຖືກຕ້ອງຕາມມາດຕະຖານ ແຫ່ງຊາດ ແລະ ມາດຕະຖານສາກົນ; ການຈັດຕັ້ງປະຕິບັດວຽກງານດັ່ງກ່າວນີ້ເປັນ ການປະກອບສ່ວນ ຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມ 05 ປີ ຄັ້ງທີ VIII (2016-2020) ຂອງ ສປປ ລາວ ໃຫ້ປະກົດຜົນເປັນຈິງ.

        ທ່ານຍັງໄດ້ກ່າວຕື່ມວ່າ ທີ່ກ່າວມາຂ້າງເທິງນັ້ນ ກະຊວງວິທະຍາສາດ ແລະ ເຕັກໂນໂລຊີ ຈຶ່ງໄດ້ຊີ້ນໍາໃຫ້ກົມມາດຕະຖານ ແລະ ວັດແທກ ປະສານສົມທົບກັບບັນດາພາກສ່ວນທີ່ກ່ຽວຂ້ອງກະກຽມເງື່ອນໄຂດັ່ງນີ້:

ດ້ານນິຕິກຳ ແມ່ນໃຫ້ມີການສ້າງລະບຽບການ, ມາດຕະຖານໃນການກໍານົດວິທີການກວດສອບ, ການສ້າງລະບົບການຢັ້ງຢືນມາດຕະຖານສາກົນດ້ານຄວາມປອດໄພຂອງ ອຸປະກອນໄຟຟ້າພິເສດ;  ການພັດທະນາຊັບພະຍາກອນມະນຸດ ແລະ ສ້າງວິຊາການ ໄດ້ມີການຈັດຝຶກອົບຮົມກ່ຽວກັບວຽກງານດັ່ງກ່າວ ແລະ ເຜີຍແຜ່ໃຫ້ພາກລັດ ແລະ ເອກະຊົນຮັບຊາບ; ມີການຈັດຫາວິຊາການ, ອຸປະກອນ ແລະ ຄູ່ມືການກວດສອບ.

       ເພື່ອຮອງຮັບວຽກງານກວດສອບດັ່ງກ່າວ. ສູນ ຢັ້ງຢືນມາດຕະຖານ ແລະ ກວດກາມາດຕະ ຖານ ແຫ່ງຊາດ ຂອງ ກົມມາດຕະຖານ ແລະ ວັດແທກ ຈະໄດ້ດໍາເນີນການສ້າງຫ້ອງກວດສອບ ແລະ ຢັ້ງຢືນມາດຕະຖານ ອຸປະກອນໄຟຟ້າພິເສດ ທີ່ນໍາເຂົ້າມາຈໍາໜ່າຍຢູ່ໃນທົ່ວປະເທດຕາມກົດໝາຍ ຂອງ ສປປ ລາວ ກຳນົດໄວ້.

         ການກວດກາດັ່ງກ່າວຈະໄດ້ດຳເນີນເລີ່ມຈາກ ການກວດກາເອກະສານ ແລະ ຢັ້ງຢືນມາດຕະຖານ ອຸປະກອນໄຟຟ້າພິເສດ. ທີ່ເປັນລະບົບ ຄຸນນະພາບເບື້ອງຕົ້ນ, ຫຼັງຈາກນັ້ນ ຈະໄດ້ມີການກວດຄຸນນະພາບລະອຽດ ໂດຍຜ່ານການປະເມີນຈາກຜູ້ປະເມີນສະເພາະດ້ານ ຂອງ ສູນຢັ້ງຢືນມາດຕະຖານ ແລະ ກວດກາຄຸນນະພາບ ແຫ່ງຊາດ.

 

ຮູບພາບ: ນາງ ວິໄລລັກ ອ່ອນສີພັນລາ

ບົດຂ່າວ: ທ້າວ ພຸດທະຈັນ ຊັບທະວີ