ໜ້າຫຼັກ

ກ່ຽວກັບພວກເຮົາ

ຂ່າວ ແລະ ກິດຈະກຳ

ນິຕິກຳ

ສື່ ແລະ ສິ່ງພິມ

ຕິດຕໍ່ພວກເຮົາ

ຂ່າວສານ
  • Register
ວັນອັງຄານ, 20 ພະຈິກ 2018 00:00

ກອງປະຊຸມສຳມະນາວິທະຍາສາດກ່ຽວກັບການປະຕິວັດອຸດສາຫະກຳຄັ້ງທີ4

ໃນວັນທີ 13 ພະຈິກ 2018 ຜ່ານມາ ຢູ່ທີ່ຖໍ້າຊ້າງລອດ ເມືອງວຽງໄຊ, ແຂວງຫົວພັນ ກະຊວງວິທະຍາສາດ ແລະ ເຕັກໂນໂລຊີ (ກວຕ) ໄດ້ຈັດກອງປະຊຸມສຳມະນາວິທະຍາສາດກ່ຽວກັບການປະຕິວັດອຸດສາຫະກຳຄັ້ງທີ 4 ພາຍໃຕ້ການເປັນປະທານຮ່ວມຂອງທ່ານ ບັນດິດ ສຈ.ບໍ່ວຽງຄຳ ວົງດາລາ, ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ແລະ ທ່ານ ວັນໄຊ ແພງຊຸມມາ, ກຳມະການສູນກາງພັກ, ເລຂາພັກແຂວງ ເຈົ້າແຂວງໆຫົວພັນ.

ທ່ານ ລັດຖະມົນຕີ ກວຕ ໄດ້ກ່າວເປິດກອງປະຊຸມຄັ້ງນີ້ວ່າ: ຂະບວນຄາລາວານນັກວິທະຍາສາດລາວຫວນຄືນສູ່ເມືອງວຽງໄຊຖານທີ່ໝັ້ນຂອງການປະຕິວັດລາວ ຊຶ່ງມາຮອດປີນີ້ຄົບຮອບ 50 ປີພໍດີ, ເມືອງວຽງໄຊໃນເມື່ອກ່ອນເປັນນະຄອນຫຼວງຂອງການປະຕິວັດລາວ ເປັນອູ່ກຳເນີດຂອງການປະຕິວັດລາວໃນທົ່ວປະເທດ, ເມືອງວຽງໄຊແຫ່ງນີ້ເປັນດັ່ງລັດເອກະລາດແຫ່ງໜຶ່ງຂອງເຂດປົດປ່ອຍ ເພື່ອສ້າງພື້ນຖານອັນໜັກແໜ້ນໃຫ້ແກ່ການປົດປ່ອຍໃນຂອບເຂດທົ່ວປະ ເທດ. ເມືອງວຽງໄຊບໍ່ພຽງແຕ່ເປັນບ່ອນສ້າງກຳລັງປ້ອງກັນຊາດ, ສູນກາງທາງດ້ານເສດຖະກິດ ແລະ ການຄຸ້ມຄອງບໍລິຫານຕ່າງໆ ແຕ່ຍັງເປັນໃຈກາງແຫ່ງວັດທະນະທຳ-ສັງຄົມໃນສະໄໝນັ້ນ, ສູນກາງພັກ ແລະ ແນວລາວຮັກຊາດມີວິໄສທັດ ເບິ່ງກວ້າງມອງໄກເລີ່ມແຕ່ເວລານັ້ນມາ. ນອກຈາກສ້າງກຳລັງປະຕິວັດເຂັ້ມແຂງແລ້ວຍັງໄດ້ສ້າງບັນດາໜໍ່ແໜງນັກຮຽນ, ນັກສຶກສາເພື່ອໃຫ້ພັດທະນາກ້າວຂຶ້ນມາເປັນນັກວິທະນາສາດລາວໃນປະຈຸບັນ; ສະນັ້ນຂະບວນການ ເຄື່ອນໄຫວຂອງນັກວິທະນາສາດລາວທຸກມື້ນີ້ມີຄວາມເຂັ້ມແຂງກໍ່ຍ້ອນມີເມືອງວຽງໄຊໃນເມື່ອກ່ອນເປັນບ່ອນອົບຮົມບົ່ມເພາະສ້າງນັກວິທະຍາສາດລາວເຮົາ. 
ການເປີດກອງປະຊຸມສຳມະນາວິທະຍາສາດເພື່ອຄົ້ນຄວ້າບັນຫາການປະຕິວັດອຸດສາຫະກຳຄັ້ງທີ 4 ໃນຄັ້ງນີ້ ຈິງມີຄວາມສຳຄັນທີ່ສຸດຕໍ່ການປະຕິວັດຂອງພວກເຮົາເວົ້າລວມ, ເວົ້າສະເພາະແມ່ນນັກວິທະຍາສາດລາວ ຊຶ່ງເປັນຜູ້ຄົ້ນຄວ້າ, ນຳໃຊ້ວິທະນາສາດ ແລະ ເຕັກໂນໂລຊີ ເຂົ້າໃນການພັດທະນາປະເທດຊາດເພື່ອເຊື່ອມໂຍ່ງກັບພາກພື້ນ ແລະ ສາກົນ. ທັງເປັນການນຳເອົາວິທະຍາສາດເຕັກໂນໂລຊີມາພັດທະນາປະເທດຊາດເຮົາ ເພື່ອໃຫ້ສຳເລັດ 2 ໜ້າທີຍຸດທະສາດຄື: ປົກປັກຮັກສາ ແລະ ສ້າງສາພັດທະນາປະເທດຊາດ.
ກອງປະຊຸມດັ່ງກ່າວ, ຜູ້ເຂົ້າຮ່ວມໄດ້ຮັບຟັງພາລະບົດບາດຂອງວິທະຍາສາດ ແລະ ເຕັກໂນໂລຊີຕໍ່ການພັດທະນາເສດຖະກິດ - ສັງຄົມ, ຄວາມຮູ້ພື້ນຖານກ່ຽວກັບການປະຕິວັດອຸດສາຫະກໍາຄັ້ງທີ4, ຄວາມຮູ້ພື້ນຖານກ່ຽວກັບອິນເຕີເນັດແຫ່ງສັບພະສິ່ງ, ຖານຂໍ້ມູນມະຫາສານ ແລະ ກຸ່ມຂໍ້ມູນຜູກພັນ, ຄວາມຮູ້ພື້ນຖານກ່ຽວກັບປັນຍາດິດ, ຫຸ້ນຍົນ ແລະ ພາຫະນະບໍ່ມີີຄົນຂັບຂີ່ໃນຍຸກ 4.0, ການປະຕິບັດການຈັດຕັ້ງ ແລະ ການສ້າງບຸກຄະລາກອນຂອງ ສປປລາວ, ວຽກງານມາດຕະຖານ, ວັດເແທກ ແລະ ກວດກາຄຸນນະພາບ, ການຄຸ້ມຄອງ ແລະ ບໍລິການວຽກຊັບສິນທາງປັນຍາໃນຍຸກ 4.0.
ໃຫ້ກຽດເຂົ້າຮ່ວມກອງປະຊຸມສຳມະນາຄັ້ງ, ມີບັນດາທ່ານຮອງລັດຖະມົນຕີ ກວຕ , ຫົວໜ້າກົມ, ຫົວໜ້າພະແນກວິທະຍາສາດ ແລະ ເຕັກໂນໂລຊີທົ່ວປະເທດ ແລະ ແຂກຖືກເຊີນຈາກພະແນການ, ກົມກອງອ້ອມຂ້າງເທດສະບານແຂວງ, ການນຳເມືອງວຽງໄຊເຂົ້າຮ່ວມ 200 ກວ່າທ່ານ.

 

ພາບ: ທ ພຸດທະຈັນ ຊັບທະວີ

ຂ່າວ: ນ. ທັດສະນີ ພົງບັນດິດ