ໜ້າຫຼັກ

ກ່ຽວກັບພວກເຮົາ

ຂ່າວ ແລະ ກິດຈະກຳ

ນິຕິກຳ

ສື່ ແລະ ສິ່ງພິມ

ຕິດຕໍ່ພວກເຮົາ

ຂ່າວສານ
  • Register
ວັນອັງຄານ, 20 ພະຈິກ 2018 00:00

ຄາລະວານນັກວິທະຍາສາດລາວ ຫວນຄືນສູ່ເມືອງວຽງໄຊ ຖານທີ່ໜັ້ນການປະຕິວັດລາວ

ໃນລະຫວ່າງວັນທີ 11-16 ພະຈິກ 2018 ກະຊວງວິທະຍາສາດ ແລະ ເຕັກໂນໂລຊີ ໄດ້ຈັດຂະບວນຄາລະວານນັກວິທະຍາສາດລາວ ຫວນຄືນສູ່ເມືອງວຽງໄຊ ຖານທີ່ໜັ້ນການປະຕິວັດລາວ. ໂດຍການນຳໜ້າຂະບວນຂອງ ທ່ານ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ,

ເລຂາພັກກະຊວງ, ລັດຖະມົນຕິ ກະຊວງວິທະຍາສາດ ແລະ ເຕັກໂນໂລຊີ, ມີບັນດາທ່ານ ຮອງລັດຖະມົນຕີ, ຫົວຫນ້າຫ້ອງການ, ກົມ, ສະຖາບັນ, ຫົວຫນ້າພະແນກ ວຕ ແຕ່ລະແຂວງ, ຮອງອະທິການບໍດີມະຫາໄລແຫ່ງຊາດ, ອະດິດຄູອາຈານ ແລະ ນັກຮຽນຈາກໂຮງຮຽນອຸດົມຖໍ້າແກ້ວ ແລະ ພະນັກງານພາຍໃນກະຊວງ ຈຳນວນ 100 ກວ່າຄົນເຂົ້າຮ່ວມ. ໃນຕອນແລງວັນທີ 12 ພະຈິກ 2018 ຂະບວນຄາລະວານໄດ້ເດີນທາງມາຮອດສວນແກ້ວຫຼັກເມືອງ ເທດສະບານຕົວເມືອງຊຳເໜືອ ໂດຍໃຫ້ການຕ້ອນຮັບຢ່າງອົບອຸ່ນຂອງທ່ານ ຄຳວອນ ບຸນທະວົງ, ຮອງເລຂາພັກແຂວງ, ປະທານສະພາປະຊາຊົນແຂວງຫົວພັນ ພ້ອມດ້ວຍພະນັກງານ-ລັດຖະກອນພາຍໃນແຂວງຫົວພັນ, ນ້ອງນັກຮຽນ, ນັກສຶກສາ ແລະ ພໍ່ແມ່ປະຊາຊົນບັນດາເຜົ່າອອ້ມຂ້າງເທດສະບານເມືອງຊຳເໜືອ. 
ຂະບວນຄາລາວານນັກວິທະຍາສາດລາວ ຫວນຄືນສູ່ເມືອງວຽງໄຊ ຖານທີ່ໜັ້ນການປະຕິວັດລາວໃນຄັ້ງນີ້, ສຸດທີ່ມີຄວາມໝາຍຄວາມສຳຄັນຢ່າງເລີກເຊີ່ງ, ເພາະເປັນຄັ້ງທຳອິດທີ່ຂອງຂະບວນຄາລະວານນັກວິທະຍາສາດລາວ ຫວນຄືນສູ່ບົນດິນແດນທີ່ອຸດົມສົມບູນໄປດ້ວຍຊັບພະຍາກອນທຳມະຊາດທີ່ສວຍສົດງົດງາມ, ທັງເປັນດິນແດນທີ່ມີມູນເຊື້ອແຫ່ງປິຊາສາມາດ, ຄວາມສະຫຼາດສ່ອງໃສ່ຂອງພັກປະຊາຊົນປະຕິວັດລາວໃນການນຳພາຕໍ່ສູ້ປົດປ່ອຍຊາດ ແລະ ທັງເປັນການສ້າງຂະບວນການ ແລະ ຜົນງານຂໍ່ານັບຮັບຕ້ອນວັນສຳຄັນຂອງພັກ, ຂອງຊາດ ເປັນຕົ້ນແມ່ນວັນສະຖາປະນາສາທະລະນະລັດ ປະຊາທິປະໄຕ ປະຊາຊົນລາວ ຄົບຮອບ 43ປີ, ວັນຄ້າຍວັນເກີດຂອງປະທານໄກສອນ ພົມວິຫານ ຄົບຮອບ 98ປີ ແລະ ວັນສ້າງຕັ້ງກອງທັບປະຊາຊົນລາວຄົບຮອບ 70ປີ, ພິເສດແມ່ນສະເຫຼີມສະຫຼອງ ວັນສ້າງຕັ້ງເມືອງ ວຽງໄຊ ແດນດິນປະຫວັດສາດ ຖານທີ່ໝັ້ນຂອງການປະຕິວັດລາວ ຄົບຮອບ 50 ປີ (30/11/1968-30/11/2018). 
ໃນໂອກາດດັ່ງກ່າວ, ທ່ານ ຄຳວອນ ບຸນທະວົງ ໄດ້ມີຄຳເຫັນກ່າວຕ້ອນຮັບຄະນະຜູ້ແທນຂະບວນຄາລາວານນັກວິທະຍາສາດລາວ ຫວນຄືນສູ່ເມືອງວຽງໄຊ ຖານທີ່ໜັ້ນການປະຕິວັດລາວໃນຄັ້ງນີີວ່າ: ມື້ນີ້ ຢູ່ບົນດິນແດນແຂວງຫົວພັນ ກໍຄືດິນແດນເມືອງວຽງໄຊແຂວງຫົວພັນວິລະຊົນ ເຊິ່ງເປັນນະຄອນຫຼວງຂອງການປະຕິວັດລາວ ທີ່ໃສ່ຊື່ລັບຂອງປະທານ ໄກສອນ ພົມວິຫານ ວິລະບຸລຸດແຫ່ງຊາດລາວຜູ້ຍິງໃຫຍ່ ເປັນເຂດຖານທີ່ໝັ້ນຂອງການປະຕິວັດລາວ, ເປັນຖິ່ນກຳເນີດຂອງສາທາລະນະລັດ ປະຊາທິປະໄຕ ປະຊາຊົນລາວ. ແຂວງຫົວພັນຂອງພວກເຮົາ ມີທີ່ຕັ້ງຢູ່ຫ່າງໄກສອກຫຼີກ ຫ້ວຍເລິກພູຊັນ, ການພັດທະນາເສດຖະກິດ-ສັງຄົມຂະຫຍາຍຕົວຊ້າ, ພື້ນຖານໂຄງລ່າງມີຄວາມຫຍຸ້ງຍາກ ໂດຍສະເພາະແມ່ນເສັ້ນທາງມະນາຄົມ ກ່ອນຈະມາຮອດກໍ່ຕ້ອງໄດ້ໃຊ້ເວລາຫຼາຍມື້ຫຼາຍວັນ. ແຕ່ດຖິງຢ່າງໃດກໍ່ຕາມແຂວງພວກເຮົາກໍ່ໄດ້ຮັບຄວາມເອົາໃຈໃສ່ຈາກພັກ ແລະ ລັດຖະບານເປັນພິເສດໃນຊຸມປີຜ່ານມາຈົນຮອດປັດຈຸບັນ ຈຶ່ງເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່າດີຂື້ນກ້າວໆ.
ທ່ານ ຍັງໄດ້ກ່າວອີກຕື່ມວ່າ: ຄະນະຄາລາວານໃນຄັ້ງນີ້, ລ້ວນແລ້ວແຕ່ແມ່ນນັກວິທະຍາສາດ ເປັນຜູ້ຄົ້ນຄວ້າ ນຳໃຊ້ວິທະຍາສາດ ແລະ ເຕັກໂນໂລຊີໃໝ່ເຂົ້າໃນການພັດທະນາປະເທດຊາດເພື່ອເຊື່ອມໂຍງກັບພາກພຶ້ນ ແລະ ສາກົນ, ນຳພາປະເທດເຮົາຫຼຸດພົ້ນຈາກຄວາມດ້ອຍພັດທະນາເທື່ອລະກ້າວ. ເຖິງແຂວງພວກເຮົາຈະຢູ່ຫ່າງໄກສອກຫຼີກ, ມີຄວາມຫຍຸ້ງຍາກຫຼາຍປະການໃດກໍ່ຕາມ ແຕ່ບັນດາຄະນະຜູ້ແທນກໍ່ໄດ້ຕັດສິນໃຈເສຍສະຫຼະເວລາອັນມີຄ່າຫວນຄືນສູ່ຖານທີ່ໝັ້ນຂອງການປະຕິວັດລາວແຫ່ງນີ້. ການມາຢ້ຽມຢາມຂອງບັນດາຄະນະຜູ້ແທນເທື່ອນີ້ແມ່ນການປຸກລະດົມ, ໃຫ້ກຳລັງໃຈອັນໃຫຍ່ຫຼວງ ແລະ ສູງສົ່ງໃຫ້ແກ່ການນຳແຂວງ, ການນຳເມືອງ, ພະນັກງານ, ສະມາຊິກພັກ, ກຳລັງປະກອບອາວຸດ ແລະ ປະຊາຊົນບັນດາເຜົ່າພາຍໃນແຂວງຫົວພັນ ໃນການບຸກບືນຈັດຕັ້ງປະຕິບັດໜ້າວຽກງານຂອງຕົນ ແລະ ປະຊາຊົນມີຄວາມບຸກບືນພັດທະນາເສດຖະກິດຄອບຄົວຂອງເຂົາເຈົ້າໃຫ້ນັບມື້ນັບດີຂື້ນກວ່າເກົ່າ.
ຂະບວນຄາລະວານໃນຄັ້ງນີ້ຍັງໄດ້ຈັດກິດຈະກຳຕ່າງໆເຊັ່ນ: ໄຫ້ວພະເຈົ້າອົງຕື້, ທ່ຽວຊົມທິວທັດທຳມະຊາດ ເມືອງວຽງໄຊ ແລະ ທ່ຽວຊົມຖໍ້າຂອງບັນດາທ່ານຜູ້ນຳທີ່ໃຊ້ເປັນບ່ອນຢູ່ອາໄສເຮັດໜ້າທີ່ການເມືອງເພື່ອການປະຕິວັດປົດປ່ອຍປະເທດຊາດໃນເມື່ອກ່ອນ, ເພື່ອເປັນການຊອກຮູ້ມູນເຊື້ອການນຳພາອັນສະຫຼາດສ່ອງໃສ່ຂອງພັກປະຊາຊົນປະຕິວັດລາວ ພາຍໃຕ້ການນຳພາຂອງທ່ານ ປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ແລະ ມູນເຊື້ອຄວາມສາມັກຄີ, ນໍ້າໃຈອົງອາດກ້າຫານຕໍ່ສູ້ມີໄຊຂອງປະຊາຊົນບັນດາເຜົ່າເມືອງວຽງໄຊ ແຂວງຫົວພັນ. ພ້ອມນັ້ນ, ຢ້ຽມຢາມໂຮງຮຽນທິດສະດີການເມືອງການປົກຄອງຂອງແຂວງ, ທ່ຽວຊົມພື້ນຖານການຜະລິດ ແລະ ຄອບຄົວຕົວແບບ ພ້ອມທັງຈັດກອງປະຊຸມສຳມະນາວິທະຍາສາດກ່ຽວກັບການປະຕິວັດອຸດສາຫະກຳ ຄັ້ງທີ 4 ທີ່ຖໍ້າຊ້າງລອດ ເມືອງວຽງໄຊ ອີກດ້ວຍ.

 

 

ພາບ: ທ ພຸດທະຈັນ ຊັບທະວີ

ຂ່າວ: ນ. ທັດສະນີ ພົງບັນດິດ