ໜ້າຫຼັກ

ກ່ຽວກັບພວກເຮົາ

ຂ່າວ ແລະ ກິດຈະກຳ

ນິຕິກຳ

ສື່ ແລະ ສິ່ງພິມ

ຕິດຕໍ່ພວກເຮົາ

ຂ່າວສານ
  • Register
ວັນພຸດ, 31 ຕຸລາ 2018 00:00

ຈະຮ່ວມມືສຶກສາຄວາມເປັນໄປໄດ້ໃນການສ້າງມາດຕະຖານ ແລະ ຢັ້ງຢືນລະບົບການກວດກາຄຸນນະພາບ ການບໍລິການ ແລະ ການທ່ອງທ່ຽວ ໃນ ສປປ ລາວ Featured

 ວັນທີ 23 ຕຸລາ 2018 ກົມມາດຕະຖານ ແລະ ວັດແທກ ໄດ້ມີການຈັດພິທີເຊັນບົດບັນທຶກຄວາມເຂົ້າໃຈ (MOU) ກ່ຽວກັບການຮ່ວມມືສຶກສາຄວາມເປັນໄປໄດ້ໃນການສ້າງມາດຕະຖານ ແລະ ຢັ້ງຢືນລະບົບການກວດກາຄຸນນະພາບ ການບໍລິການ ແລະ ການທ່ອງທ່ຽວ ໃນ ສປປ ລາວ, ພິທີດັ່ງກ່າວໄດ້ຖືກຈັດຂຶ້ນທີ່ ສວນນ້ຳອິນແປງ ຣີເວີໄຊ້, ນະຄອນຫຼວງວຽງຈັນ, ໃຫ້ກຽດເປັນປະທານໂດຍ ທ່ານ ບັນດິດ ສຈ ບໍ່ວຽງຄຳ ວົງດາລາ ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງ ວິທະຍາສາດ ແລະ ເຕັກໂນໂລຊີ, ທັງເປັນປະທານ ສະພາວິທະຍາສາດແຫ່ງຊາດ.

ໃຫ້ກຽດຂຶ້ນເຊັນສັນຍາ ໂດຍທ່ານ ວຽງທອງ ວົງທະວິໄລ ຫົວໜ້າກົມມາດຕະຖານ ແລະ ວັດແທກ, ທ່ານ ນາງ ສຸພັນສາ ວັນນະໂພ ຮອງຫົວໜ້າສູນຢັ້ງຢືນມາດຕະຖານ ແລະ ກວດກາຄຸນນະພາບແຫ່ງຊາດ ແລະ ທ່ານ ແອັດ ພັນນີວົງ, ປະທານ ບໍລິສັດ ອິນແປງກຣູບ ຈຳກັດຜູ້ດຽວ.

         ໃນພິທີດັ່ງກ່າວ ທ່ານ ຫົວໜ້າ ກົມມາດຕະຖານ ແລະ ວັດແທກ ໄດ້ກ່າວວ່າ: ໂດຍປະຕິບັດຕາມພາລະບົດບາດຂອງ ກົມມາດຕະຖານ ແລະ ວັດແທກ, ກະຊວງວິທະຍາສາດ ແລະ ເຕັກໂນໂລຊີ ແລະ ປະຕິບັດຕາມ ກົດໝາຍວ່າດ້ວຍມາດຕະຖານ ແລະ ກົດໝາຍວ່າດ້ວຍການວັດແທກ ວຽກງານການກວດກາຢັ້ງຢືນຄຸນນະພາບ ກ່ຽວກັບການບໍລິການ ແລະ ການທ່ອງທ່ຽວ ກໍຖືເປັນວຽກງານຫນຶ່ງ ທີ່ສໍາຄັນ ໃນປະຈຸບັນເຊິ່ງຈັດເຂົ້າໃນຫນຶ່ງບູລິມະສິດ ໃນການສ້າງມາດຕະຖານ ແຫ່ງຊາດ ສະນັ້ນ, ໃນຊຸມປີຜ່ານມາອີງໃສ່ສັງຄົມ ໄດ້ມີຄວາມຮຽກຮ້ອງຕ້ອງການ ໃຫ້ເອົາໃຈໃສ່ເຖິງ ການກວດກາຢັ້ງຢືນຄຸນນະພາບ ກ່ຽວກັບການບໍລິການ ແລະ ການທ່ອງທ່ຽວ ໃນ ສປປ ລາວ ຈາກພາກສ່ວນລັດ ແລະ ເອກະຊົນ ເພື່ອໃຫ້ສອດຄ່ອງກັບມາດຕະຖານແຫ່ງຊາດ ສາມາດເຊື່ອມໂຍງເຂົ້າກັບພາກພື້ນ ແລະ ສາກົນ.

          ດັ່ງນັ້ນ, ຈຸດປະສົງໃນການຈັດພິທີເຊັນບົດບັນທຶກຄວາມເຂົ້າໃຈ (MOU) ໃນຄັ້ງນີ້ກໍ່ເພື່ອຕອບສະໜອງ ຄວາມຮຽກຮ້ອງຕ້ອງການຂອງສັງຄົມ ທັງເປັນການເອື້ອອໍານວຍຄວາມສະດວກໃຫ້ແກ່ພາກລັດ ແລະ ເອກະຊົນ ຮັບປະກັນຄຸນນະພາບ ແລະ ສອດຄ່ອງຕາມມາດຕະຖານ ແຫ່ງຊາດ ພາກພື້ນ ແລະ ມາດຕະຖານສາກົນທີ່ໄດ້ກຳນົດໃວ້, ເພື່ອເປັນການຕອບສະໜອງນະໂຍບາຍຂອງພັກ-ລັດຖະບານ ໃນການສ້າງຄວາມເຂັ້ມແຂງພື້ນຖານໂຄງລ່າງດ້ານຄຸນນະພາບແຫ່ງຊາດ, ຮັບປະກັນຄວາມປອດໄພຂອງປະຊາຊົນ, ເປັນການປັບປຸງ ລະບົບມາດຕະຖານໃຫ້ມີຄວາມສົມບູນ ແລະ ສອດຄ່ອງກັບລະບຽບ ຫລັກການ ທີ່ໄດ້ກຳນົດໄວ້, ທັງເປັນການໂຄສະນາ, ເຜີຍແຜ່ ແລະ ຝຶກອົບຮົມກ່ຽວກັບມາດຕະຖານ ແລະ ຄຸນນະພາບ ຂອງການບໍລິການ ແລະ ທ່ອງທ່ຽວໃຫ້ແກ່ພາກລັດ ແລະ ເອກະຊົນໄດ້ຮັບຮູ້ແລະເຂົ້າໃຈທັງໄລຍະສັ້ນ ແລະ ໄລຍະຍາວ, ໂຄງການຮ່ວມມືດັ່ງກ່າວ ແມ່ນຍັງຊ່ວຍກໍ່ສ້າງພະນັກງານວິຊາການ, ປະກອບບຸກະຄະລາກອນ, ອຸປະກອນ ແລະ ຄູ່ມືການກວດສອບທີ່ເປັນບ່ອນອີງໃນການຈັດຕັ້ງປະຕິບັດວຽກງານ ດ້ານການກວດກາຄຸນນະພາບ ໃຫ້ມີຄວາມສາມາດ ແລະ ເປັນທີ່ຍອມຮັບ,​ ທັງສາມາດເຊື່ອມໂຍງກັບພາກພື້ນ ແລະ ສາກົນໄດ້ ໃນອະນາຄົດ.

ທ່ານ ຍັງໄດ້ກ່າວຕື່ມອີກວ່າ ການຈັດຕັ້ງປະຕິບັດວຽກງານດັ່ງກ່າວນີ້ເປັນ ການປະກອບສ່ວນ ຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມ 05 ປີ ຄັ້ງທີ VIII (2016-2020) ຂອງ ສປປ ລາວ ໃຫ້ປະກົດຜົນເປັນຈິງ. ເພື່ອຮອງຮັບວຽກງານກວດສອບດັ່ງກ່າວ. ສູນ ຢັ້ງຢືນມາດຕະຖານ ແລະ ກວດກາມາດຕະຖານ ແຫ່ງຊາດ ຂອງ ກົມມາດຕະຖານ ແລະ ວັດແທກ ຈະໄດ້ດໍາເນີນການການຮ່ວມມືສຶກສາຄວາມເປັນໄປໄດ້ໃນການສ້າງມາດ ຕະຖານ ແລະ ຢັ້ງຢືນລະບົບການກວດກາຄຸນນະພາບ ການບໍລິການ ແລະ ການທ່ອງທ່ຽວ ໃນ ສປປ ລາວ ເພື່ອຈັດຕັ້ງປະຕິບັດໃຫ້ສຳເລັດຕາມແຜນການ.

 

ຮູບພາບ ແລະ ບົດຂ່າວ: ທ ພຸດທະຈັນ ຊັບທະວີ