ໜ້າຫຼັກ

ກ່ຽວກັບພວກເຮົາ

ຂ່າວ ແລະ ກິດຈະກຳ

ນິຕິກຳ

ສື່ ແລະ ສິ່ງພິມ

ຕິດຕໍ່ພວກເຮົາ

ຂ່າວສານ
  • Register
ວັນອັງຄານ, 23 ຕຸລາ 2018 00:00

ຈະສ້າງຫ້ອງກວດສອບຄຸນນະພາບແຮ່ທາດ, ວັດຖຸມີຄ່າ ແລະ ອັນຍະມະນີ ໃນ ສປປ ລາວ

ວັນທີ 19 ຕຸລາ 2018 ກົມມາດຕະຖານ ແລະ ວັດແທກ(ກມວ) ໄດ້ມີການຈັດພິທີເຊັນບົດບັນທຶກຄວາມເຂົ້າໃຈ (MOU) ກ່ຽວກັບການຮ່ວມສ້າງຫ້ອງກວດສອບຄຸນນະພາບແຮ່ທາດ, ວັດຖຸມີຄ່າ ແລະ ອັນຍະມະນີ ໃນ ສປປ ລາວ, ພິທີດັ່ງກ່າວໄດ້ຖືກຈັດຂຶ້ນທີ່ ໂຮງແຮມດອນຈັນ ພາເລດ ນະຄອນຫຼວງວຽງຈັນ, ໃຫ້ກຽດເປັນປະທານໂດຍ ທ່ານ ບັນດິດ ສຈ ບໍ່ວຽງຄຳ ວົງດາລາ  ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງ ວິທະຍາສາດ ແລະ ເຕັກໂນໂລຊີ, ທັງເປັນປະທານ ສະພາວິທະຍາສາດແຫ່ງຊາດ.

ໃຫ້ກຽດຂຶ້ນເຊັນສັນຍາ ໂດຍທ່ານ ວຽງທອງ ວົງທະວິໄລ ຫົວໜ້າກົມມາດຕະຖານ ແລະ ວັດແທກ, ທ່ານ ບຸນໂຮມ ພານຸວົງ ຫົວໜ້າສູນຢັ້ງຢືນມາດຕະຖານ ແລະ ກວດກາຄຸນນະພາບແຫ່ງຊາດ, ກມວ ແລະ ທ່ານ ຄໍາຜາຍ ສີລາຊາ ປະທານ ບໍລິສັດ ກຸ່ມດວງຈະເລີນພັດທະນາກໍ່ສ້າງ ຈໍາກັດ.

         ຈຸດປະສົງ ແມ່ນເພື່ອຮ່ວມກັນສຶກສາຄວາມເປັນໄປໄດ້ຂອງການຄຸ້ມຄອງໂຄງການ ສ້າງຫ້ອງກວດສອບຄຸນນະພາບແຮ່ທາດ, ວັດຖຸມີຄ່າ ແລະ ອັນຍະມະນີ ຢູ່ ສປປ ລາວ ເພື່ອເປັນການຕອບສະໜອງນະໂຍບາຍຂອງລັດຖະບານ ໃນການສ້າງພື້ນຖານໂຄງລ່າງດ້ານຄຸນນະພາບແຫ່ງຊາດ,  ການບໍລິການ ກວດສອບຄຸນນະພາບແຮ່ທາດ, ວັດຖຸມີຄ່າ ແລະ ອັນຍະມະນີ ໃຫ້ກັບສັງຄົມ, ເອື້ອອໍານວຍຄວາມສະດວກໃຫ້ແກ່ພາກລັດ ແລະ ເອກະຊົນ ໃຫ້ຮັບປະກັນຄຸນນະພາບ, ຖືກຕ້ອງຕາມມາດຕະຖານ ແຫ່ງຊາດ ແລະ ມາດຕະຖານສາກົນ, ທັງເປັນການຮັບປະກັນຄຸນນະພາບ ຂອງຜະລິດຕະພັນ, ຄວາມປອດໄພຂອງປະຊາຊົນ, ເປັນການປັບປຸງ ລະບົບມາດຕະຖານຂອງຜະລິດຕະພັນມີຄວາມສົມບູນ ແລະ ສອດຄ່ອງກັບການກຳນົດຂອງລະບຽບການ.

ໂຄງການຮ່ວມມືດັ່ງກ່າວ ແມ່ນຊ່ວຍກໍ່ສ້າງພະນັກງານບຸກະຄະລາກອນ ດ້ານກວດກາຄຸນນະພາບ ໃຫ້ມີຄວາມສາມາດ ແລະ ເປັນທີ່ຍອມຮັບ, ທັງສາມາດເຊື່ອມໂຍງກັບພາກພື້ນ ແລະ ສາກົນໄດ້ ໃນວຽກງານການກວດກາ ແລະ ຢັ້ງຢືນຄຸນນະພາບແຮ່ທາດ, ວັດຖຸມີຄ່າ ແລະ ອັນຍະມະນີ.

ການຈັດຕັ້ງປະຕິບັດວຽກງານດັ່ງກ່າວນີ້ເປັນ ການປະກອບສ່ວນ ຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມ 05 ປີ ຄັ້ງທີ VIII (2016-2020) ຂອງ ສປປ ລາວ ໃຫ້ປະກົດຜົນເປັນຈິງ.

 

ຮູບພາບ: ນ ວິໄລລັກ ອ່ອນສີພັນລາ

ບົດຂ່າວ: ທ ພຸດທະຈັນ ຊັບທະວີ