ໜ້າຫຼັກ

ກ່ຽວກັບພວກເຮົາ

ຂ່າວ ແລະ ກິດຈະກຳ

ນິຕິກຳ

ສື່ ແລະ ສິ່ງພິມ

ຕິດຕໍ່ພວກເຮົາ

ຂ່າວສານ
  • Register
ວັນຈັນ, 15 ຕຸລາ 2018 00:00

ກອງປະຊຸມໜ່ວຍງານວິຊາການ ດ້ານການຮັບຮອງ ແລະ ປະເມີນຄວາມສອດຄ່ອງ ຂອງ ອາຊຽນ ຄັ້ງທີ 35

ກົມມາດຕະຖານ ແລະ ວັດແທກ, ກະຊວງວິທະຍາ ສາດ ແລະ ເຕັກໂນໂລຊີ ກວຕ ໄດ້ຈັດກອງປະຊຸມ ໜ່ວຍງານ

ວິຊາການດ້ານການຮອງຮັບ ແລະ ປະເມີນຄວາມສອດຄ່ອງຂອງ ອາຊຽນ ຄັ້ງທີ 35 ຫຼື (The 35th ACCSQ-WG2 Meeting) ແລະ ກອງປະຊຸມທີ່ກ່ຽວຂ້ອງອື່ນໆຕາມເວລາທີ່ໝູນວຽນກັນພາຍໃນ ອາຊຽນ ຂຶ້ນໃນຕອນ ເຊົ້າຂອງວັນທີ 04 ຕຸລາ 2018 ທີ່ໂຮງແຮມ ລາວພລາຊາ, ນະຄອນຫຼວງວຽງຈັນ.

ກອງປະຊຸມ ໄດ້ຮັບກຽດການເຂົ້າຮ່ວມເປັນປະທານຮ່ວມ ແລະ ກ່າວເປີດກອງປະຊຸມຢ່າງເປັນທາງ ການໂດຍ ທ່ານ ນາງ ນິສິດ ຄໍາມູນເຮືອງ, ຮອງຫົວໜ້າກົມມາດຕະຖານ ແລະ ວັດແທກ, ກວຕ ແລະ ທ່ານ Mr. Rosri Sain, ປະທານໜ່ວຍງານວິຊາການດ້ານການຮັບຮອງ ແລະ ປະເມີນຄວາມສອດຄ່ອງ ອາຊຽນ, ກົມມາດ ຕະຖານ ຂອງປະເທດມາເລເຊຍ ແລະ ຜູ້ຕາງໜ້າຈາກກອງເລຂາ ອາຊຽນ.

ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອສະຫຼຸບສັງລວມຜົນຂອງກອງປະຊຸມຄັ້ງທີ່ຜ່ານມາ ແລະ ສືບຕໍ່ປຶກສາຫາລື ບັນຫາຂໍ້ຄົງຄ້າງຕ່າງໆ ເຊັ່ນ: ການພັດ ທະນາພື້ນຖານໂຄງລ່າງດ້ານຄຸນນະພາບ ອາຊຽນ ແລະ ການສ້າງຄວາມເຂັ້ມແຂງທາງດ້ານວຽກງານຮັບຮອງ ແລະ ປະເມີນຄວາມສອດຄ່ອງ; ການແລກປ່ຽນຄວາມຮູ້, ຂໍ້ມູນ, ສະຖິຕິຈຳນວນໃບຢັ້ງຢືນທີ່ອອກໃຫ້ແກ່ ອົງກອນປະເມີນຄວາມສອດຄ່ອງຂອງແຕ່ລະປະເທດ ແລະ ວິທີຈັດ ຕັ້ງປະຕິບັດໃນການຮັບຮອງ ແລະ ປະເມີນຄວາມສອດຄ່ອງ ໃຫ້ມີຄວາມເປັນເອກະພາບກັນໃນການເຊື່ອມໂຍງທາງດ້ານເນື້ອໃນ ແລະ ຫຼັກການຂອງບັນດາປະເທດ ສະມາຊິກອາຊຽນດ້ວຍກັນ; ການແລກປ່ຽນບົດຮຽນ ເຊິ່ງກັນ ແລະ ກັນ ລະຫວ່າງ ພະນັກງານວິຊາການໜ່ວຍງານຮັຍຮອງ ແລະ ປະເມີນຄວາມສອດຄ່ອງຂອງ ກົມມາດຕະຖານ ແລະ ວັດແທກ ຮ່ວມກັບວິຊາການຈາກບັນດາ ປະເທດສະມາຊິກ ອາຊຽນ ໃນການພັດທະນາວຽກງານຮັບຮອງ ແລະ ປະເມີນຄວາມສອດ ຄ່ອງ ໂດຍສະເພາະ ທາງດ້ານການຈັດຕັ້ງປະຕິບັດ ໃນການຄຸ້ມຄອງບັນດາຫ້ອງ ທົດລອງ ໃນຂົງເຂດ ປະເທດສະມາຊິກ ອາຊຽນ ໃຫ້ສອດຄ່ອງກັບມາດຕະຖານສາກົນ ເພື່ອເປັນການປົກປ້ອງສິດຜົນປະໂຫຍດຂອງຜູ້ປະກອບການ, ຜູ້ຊົມໃຊ້ໃຫ້ມີ ຄວາມປອດໄພ ແລະ ຍຸຕິທຳໃນສັງຄົມ ເປັນຕົ້ນ.

ກອງປະຊຸມດັ່ງກ່າວ ຍັງໄດ້ປຶກສາຫາເຖິງການຮ່ວມມືສາກົນໃນຂົງເຂດວຽກງານການຮັບຮອງ ແລະ ປະເມີນຄວາມສອດຄ່ອງກັບປະເທດຄູ່ ຮ່ວມສັນຍາ ເຊັ່ນ: ໂຄງການຂອງສະຫະພາບເອີລົບ ທີ່ຊ່ວຍໃນການສ້າງຄວາມເຂັ້ມແຂງທາງດ້ານລະບຽບການ ແລະ ສ້າງຄວາມອາດສາມາດໃຫ້ແກ່ພະນັກງານວິຊາການໃນຂົງເຂດ ອາຊຽນ (EU-ARISE) ແລະ ໂຄງການສຳລັບການຮັບຮອງລະບົບການຢັ້ງຢືນວຽກງານປ່າໄມ້ (PEFC) ທີ່ໄດ້ເອົາໃຈໃສ່ໃຫ້ການຊ່ວຍເຫຼືອ ທາງດ້ານເຕັກນິກວິຊາການ ແລະ ພັດທະນາບຸກຄະລາກອນ ປະກອບເປັນພື້ນຖານໂຄງລ່າງອັນເຂັ້ມແຂງໃຫ້ແກ່ວຽກງານຮັບຮອງ ແລະ ປະເມີນຄວາມສອດຄ່ອງດັ່ງກ່າວ ແລະ ເປັນບ່ອນອີງໃນການຈັດຕັ້ງ ປະຕິບັດໃຫ້ປະກົດຜົນເປັນຈິງ ຕາມແນວທາງ ນະໂຍບາຍຂອງລັດຖະບານ ແລະ ແຜນຍຸດທະສາດ ຂອງປະຊາຄົມເສດຖະກິດ ອາຊຽນ.

ຄະນະຜູ້ແທນຈາກ 10 ປະເທດອາຊຽນ, ປະເທດຮ່ວມສັນຍາ, ພະນັກງານວິຊາການຂອງ ກົມມາດຕະຖານ ແລະ ວັດແທກ ທັງໝົດ 60 ກວ່າທ່ານເຂົ້າຮ່ວມ ກອງປະຊຸມດັ່ງກ່າວຊຶ່ງເລີ່ມແຕ່ວັນທີ 2-5 ຕຸລາ 2018.

ຂ່າວ: ບາລະຄອນ ສຸວັນນະພາສີ

ຮູບພາບ: ແສງທອງ ວັນນະທຳ

Latest from