ໜ້າຫຼັກ

ກ່ຽວກັບພວກເຮົາ

ຂ່າວ ແລະ ກິດຈະກຳ

ນິຕິກຳ

ສື່ ແລະ ສິ່ງພິມ

ຕິດຕໍ່ພວກເຮົາ

ຂ່າວສານ
  • Register
ວັນພະຫັດ, 04 ຕຸລາ 2018 00:00

ຈະນໍາໃຊ້ລະບົບທີ່ທັນສະໄໝ ເພື່ອເກັບຄ່າທໍານຽນ ແລະ ຄ່າບໍລິການ ການກວດກາຄຸນະພາບສິນຄ້າປະຈໍາ ດ່ານຊາຍແດນທົ່ວປະເທດ

ພິທີເຊັນບົດບັນທຶກຄວາມເຂົ້າໃຈ (MOU) ກ່ຽວກັບ ການສຶກສາການນໍາໃຊ້ເຕັກໂນໂລຊີ ລະບົບເອເລັກ ໂຕຣນິກເຂົ້າໃນການເກັບຄ່າທໍານຽນ ແລະ ຄ່າບໍລິການ ການກວດກາຄຸນະພາບສິນຄ້າປະຈໍາດ່ານຊາຍແດນທົ່ວປະເທດ ລະຫວ່າງ ພະແນກສັງລວມ, ກົມມາດຕະຖານ ແລະ ວັດແທກ, ກະຊວງວິທະຍາສາດ ແລະ ເຕັກໂນໂລຊີ (ກວຕ) ແລະ ບໍລິສັດ ເຈແອວເອສ ໄອທີໂຊລເຊີ້ນ ຈໍາກັດ ຈັດຂຶ້ນວັນທີ 1 ຕຸລາ 2018 ທີ່ໂຮງແຮມດອນຈັນ ນະຄອນຫຼວງ ວຽງຈັນ.

ຜູ້ລົງນາມໃນບົດບັນທຶກດັ່ງກ່າວ ມີທ່ານ ວຽງທອງ ວົງທະວິໄລ, ຫົວໜ້າກົມມາດຕະຖານ ແລະ ວັດ ແທກ; ທ່ານ ວຽງຄໍາ ສິງສອນໄຊ, ຫົວໜ້າພະແນກສັງລວມ ແລະ ທ່ານ ວົງພູທອນ ສີຈັນທະລາດ, ປະທານບໍລິ ສັດ ເຈແອວເອສ ໄອທີໂຊລເຊີ້ນ ຈໍາກັດ. ພິທີລົງນາມຄັ້ງນີ້ ໄດ້ຮັບກຽດການເຂົ້າຮ່ວມເປັນສັກຂີພິຍານຂອງ ທ່ານ ບໍ່ວຽງຄໍາ ວົງດາລາ, ລັດຖະມົນຕີ ກວຕ ທັງເປັນປະທານສະພາວິທະຍາສາດແຫ່ງຊາດ ພ້ອມດ້ວຍຄະນະນໍາ ກະຊວງ ແລະ ພະນັກງານວິຊາການກ່ຽວຂ້ອງ.

ທ່ານ ຫົວໜ້າກົມ ມາດຕະຖານ ແລະ ວັດແທກ ກ່າວວ່າ: ພະແນກສັງລວມ, ກົມມາດຕະຖານ ແລະ ວັດແທກ ແມ່ນໜ່ວຍງານຂອງລັດຂຶ້ນກັບ ກວຕ ທັງເຮັດພາລະບົດບາດ ແລະ ໜ້າທີ່ດໍາເນີນການນໍາໃຊ້ເຕັກໂນໂລຊີລະບົບເອເລັກໂຕຣນິກ ເຂົ້າໃນການເກັບຄ່າທໍານຽມ ແລະ ຄ່າບໍລິການ ການກວດກາຄຸນະພາບສິນຄ້າ ປະຈໍາ ດ່ານຊາຍແດນທົ່ວປະເທດ ເພື່ອຄວາມສະດວກໃນການຄຸ້ມຄອງການເກັບລາຍຮັບໃຫ້ຖືກຕ້ອງຕາມລະບຽບຫຼັກການ ແລະ ຫັນເປັນລະບົບທີ່ທັນສະໄໝທີ່ແນໃສ່ຮັບ ປະກັນຄວາມໂປ່ງໃສ ຍຸຕິທໍາໃນການເກັບງົບປະມານໃຫ້ລັດຖະບານ.

ກົມມາດຕະຖານ ແລະ ວັດແທກ ປະສານສົມທົບກັບບັນດາພາກສ່ວນກ່ຽວຂ້ອງກະກຽມເງື່ອນໄຂຕ່າງໆ ເຊັ່ນ: ແຕ່ງຕັ້ງຄະນະຮັບຜິດຊອບໂຄງການຮ່ວມມື ຂອງສອງຝ່າຍເພື່ອດໍາເນີນວຽກງານໃຫ້ບັນລຸຕາມຈຸດປະສົງ ແລະ ເປົ້າໝາຍ. ຄະນະຮັບຜິດຊອບການຮ່ວມມືດັ່ງກ່າວ ປະກອບດ້ວຍພະແນກສັງລວມ, ກົມມາດຕະຖານ ແລະ ວັດແທກ ແລະ ບໍລິສັດບໍລິສັດ ເຈແອວເອສ ໄອທີໂຊລເຊີ້ນ ຈໍາກັດ ປະສານກັບໜ່ວຍງານທີ່ກ່ຽວຂ້ອງຂອງພາກລັດຖະບານ ແລະ ພາກທຸລະກິດເພື່ອອໍານວຍຄວາມ ສະດວກໃຫ້ແກ່ການບໍລິຫານ ຄຸ້ມຄອງ, ການສົ່ງເສີມດ້ານວິຊາການ, ການພັດທະນາຊັບພະຍາກອນມະນຸດ, ການຈັດຝຶກອົບກ່ຽວກັບວຽກງານດັ່ງກ່າວ, ເຜີຍແຜ່ຂ່າວສານ ຕ່າງໆໃຫ້ຜູ້ໃຊ້ບໍລິການ, ການຈັດຫາອຸປະກອນ ແລະ ຄູ່ມືການກວດສອບຄຸນນະພາບສິນຄ້າ.

ເພື່ອຮັບປະກັນການປະຕິບັດວຽກງານດັ່ງກ່າວ ມີປະສິດທິພາບ ແລະ ປະສິດທິຜົນ, ຄູ່ຮ່ວມມືຈະໄດ້ຮ່ວມກັນດໍາເນີນການສຶກສາຄວາມເປັນໄປໄດ້ຂອງ ການນໍາ ໃຊ້ເຕັກໂນໂລຊີລະບົບເອເລັກໂຕຣນິກ ເຂົ້າໃນການເກັບຄ່າທໍານຽມ ແລະ ຄ່າບໍລິການ ການກວດກາຄຸນະພາບສິນຄ້າປະຈໍາດ່ານຊາຍແດນທົ່ວປະເທດ.

ປະທານບໍລິສັດ ເຈແອວເອສ ໄອທີໂຊລເຊີ້ນ ຈໍາກັດ ກ່າວວ່າ: ບໍລິສັດ ເປັນບໍລິສັດທີ່ປຶກສາທາງດ້ານລະບົບໄອທີ ຊຶ່ງໄດ້ດໍາເນີນທຸລະກິດເປັນເວລາ 10 ປີ ແລະ ມີຄວາມເຊື້ອໝັ້ນວ່າໂຄງການນໍາໃຊ້ລະບົບເອເລັກໂຕຣນິກເຂົ້າໃນການເກັບຄ່າທໍານຽມ ແລະ ຄ່າບໍລິການ ການກວດກາຄຸນະພາບສິນຄ້າປະຈໍາດ່ານຊາຍແດນທົ່ວປະເທດ ຈະມີຄວາມສະດວກໃນການຄຸ້ມຄອງ ການເກັບລາຍຮັບໃຫ້ຖືກຕ້ອງຕາມລະບຽບຫຼັກການ ແລະ ຫັນເປັນລະບົບທີ່ທັນສະໄໝ ເພື່ອແນໃສ່ຄວາມໂປ່ງໃສ ແລະ ຍຸຕິທໍາ ໃນການເກັບງົບປະມານໃຫ້ລັດຖະບານ.

ບົດຂ່າວ: ນ. ທັດສະນີ ພົງບັນດິດ

ຮູບພາບ: ທ ພຸດທະຈັນ ຊັບທະວີ