ໜ້າຫຼັກ

ກ່ຽວກັບພວກເຮົາ

ຂ່າວ ແລະ ກິດຈະກຳ

ນິຕິກຳ

ສື່ ແລະ ສິ່ງພິມ

ຕິດຕໍ່ພວກເຮົາ

ຂ່າວສານ
  • Register
ວັນພະຫັດ, 04 ຕຸລາ 2018 00:00

ລົງນາມສ້າງຫ້ອງກວດກາຄຸນະພາບ ແລະ ທົດສອບວິສະວະກໍາກໍ່ສ້າງ ຢູ່ ສປປ ລາວ Featured

ພິທີເຊັນສັນຍາ ການຮ່ວມມືສ້າງສູນກວດກາຄຸນະພາບ ແລະ ທົດສອບວິສະວະກໍາກໍ່ສ້າງ ຢູ່ ສປປ ລາວ ລະຫວ່າງ ສູນຢັ້ງຢືນມາດຕະຖານ ແລະ ກວດກາຄຸນະພາບແຫ່ງຊາດ, ກົມມາຕະຖານ ແລະ ວັດແທກ, ກະຊວງວິທະຍາສາດ ແລະ ເຕັກໂນໂລຊີ  (ກວຕ) ແລະ ບໍລິສັດ ລົງທຶນຕ່າງປະເທດ ແຂວງຢຸນນານ ຈໍາກັດ ໄດ້ຈັດຂຶ້ນໃນວັນທີ 28 ກັນຍາ 2018 ທີ່ໂຮງແຮມດອນຈັນ, ນະຄອນຫຼວງວຽງຈັນ.

ຜູ້ລົງນາມໃນສັນຍາດັ່ງກ່າວ ມີທ່ານ ວຽງທອງ ວົງທະວິໄລ, ຫົວໜ້າກົມມາດຕະຖານ ແລະ ວັດແທກ; ທ່ານ ບຸນໂຮມ ພານຸວົງ, ຫົວໜ້າສູນຢັ້ງຢືນມາດຕະຖານ ແລະ ກວດກາຄຸນະພາບແຫ່ງຊາດ ແລະ ທ່ານ ຫຼິວຫູ່, ປະທານບໍລິສັດ ລົງທຶນຕ່າງປະເທດ ແຂວງຢຸນນານ ຈໍາກັດ, ສປ ຈີນ.

ເຂົ້າຮ່ວມເປັນພິຍານໃນການລົງນາມຄັ້ງນີ້ ມີທ່ານ ບໍ່ວຽງຄໍາ ວົງດາລາ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ພ້ອມດ້ວຍຄະນະນໍາກະຊວງ, ບັນດາຫົວໜ້າ ກົມ, ສະຖາບັນ, ສູນ, ອົງການຈັດມະຫາຊົນ ແລະ ພະນັກງານວິຊາການສອງຝ່າຍ.

ທ່ານ ວຽງທອງ ວົງທະວິໄລ ກ່າວໃນໂອກາດພິທີລົງນາມຄັ້ງນີ້ວ່າ: ອີງຕາມພາບະບົດບາດຂອງວຽກງານມາດຕະຖານ ທີ່ຂຶ້ນກັບ ກວຕ ຈະໄດ້ດໍາເນີນການສ້າງສູນກວດກາຄຸນນະພາບ ແລະ ທົດສອບວິສະວະກໍາກໍ່ສ້າງ ຢູ່ ສປປ ລາວ ເພື່ອຕອບສະໜອງຄວາມຮຽກຮ້ອງຕ້ອງການຂອງສັງຄົມ ໃຫ້ຮັບປະກັນຄຸນະພາບ ແລະ ຖືກຕ້ອງຕາມມາດຕະຖານແຫ່ງຊາດ ແລະ ມາດຕະຖານສາກົນ.

ທ່ານ ກ່າວວ່າ: ການສ້າງສູນກວດກາຄຸນະພາບ ແລະ ທົດສອບວິສະວະກໍາກໍ່ສ້ງຢູ່ ສປປ ລາວ ເປັນການຕອບສະໜອງນະໂຍບາຍຂອງລັດຖະບານ ໃນການກໍ່ສ້າງພື້ນຖານໂຄງລ່າງດ້ານຄຸນະພາບແຫ່ງຊາດ, ສະໜອງການບໍລິການຄຸນະພາບຂອງວັດສະດຸກໍ່ສ້າງໃຫ້ກັບສັງຄົມ, ຮັບປະກັນຄຸນະພາບ ຂອງຜະລິດຕະພັນ, ຮັບປະກັນຄວາມປອດໄພໃຫ້ແກ່ປະຊາຊົນ, ເປັນການປັບປຸງລະບົບມາດຕະຖານຂອງຜະລິດຕະພັນ ແລະ ສອດຄ່ອງກັບລະບຽບການທີ່ໄດ້ກໍານົດໄວ້.

 ໂຄງການຮ່ວມມືດັ່ງກ່າວ ຍັງລວມທັງການກໍ່ສ້າງບຸກຄະລາກອນຮັບຜິດຊອບການກວດກາຄຸນະພາບ ໃຫ້ມີຄວາມສາມາດ ແລະ ເປັນທີ່ຍອມຮັບ ທັງສາມາດເຊື່ອມໂຍງກັບພາກພື້ນ ແລະ ສາກົນໄດ້ ໃນວຽກງານກວດກາ ແລະ ຢັ້ງຢືນຄູນະພາບຜະລິດຕະພັນກໍ່ສ້າງ ແລະ ວິສະວະກໍາກໍ່ສ້າງ.

ທ່ານ ຫຼິວຫູ່ ກ່າວວ່າ: ກຸ່ມບໍລິສັດກໍ່ສ້າງ ແລະ ລົງທຶນແຂວງຢຸນນານຫຸ້ນສ່ວນ ຈໍາກັດ ໄດ້ດໍາເນີນການພັດທະນາໂຄງການຮັບເໝົາລວມ ຊຶ່ງລົງທຶນຢູ່ ສປປ ລາວ ມາເປັນເວລາ 20 ປີ. ຜ່ານມາ, ບໍລິສັດ ໄດ້ຮັບເໝົາກໍ່ສ້າງໂຄງການຂະໜາດໃຫຍ່ຫຼາຍໂຄງການ ຢູ່ ລາວ ແລະ ໄດ້ຮັບການຍ້ອງຍໍຈາກລັດຖະບານລາວ. ການຮ່ວມມືຂອງສອງຝ່າຍຄັ້ງນີ້ ຖືເປັນການຮ່ວມມືທີ່ກ້າວໄປອີກກ້າວໜຶ່ງໃນການສ້າງ “ສູນກວດກາຄຸນະພາບ ແລະ ທົດສອບວິສະວະກໍາກໍ່ສ້າງແຫ່ງ ສປປ ລາວ ເພື່ອດໍາເນີນວຽກງານກວດສອບຄຸນະພາບ ແລະ ທົບສອບວິສະວະກໍາກໍ່ສ້າງໃນຂອບເຂດທົ່ວປະເທດລາວ. ການຮ່ວມມືສອງຝ່າຍຄັ້ງນີ້ ຍັງລວມໄປເຖິງການສ້າງລະບົບມາດຕະຖານວິສະວະກໍາກໍ່ສ້າງ ຂອງ ສປປ ລາວ, ສ້າງລະບົບການຄຸ້ມຄອງມາດຕະຖານຄຸນະພາບ, ຍົກສູງການຄຸ້ມຄອງຄຸນະພາບວິສະວະກໍາກໍ່ສ້າງຂອງລາວ ເພື່ອເຮັດໃຫ້ພື້ນຖານພັດທະນາຂອງຂະແໜງການກໍ່ສ້າງຢູ່ລາວ ໄດ້ມາດຕະຖານສາກົນ.

ໂຄງການດັ່ງກ່າວ ລົງທຶນ 8.000.000 ໂດລາສະຫະລັດ ຫຼື ປະມານ 68,07 ຕື້ກີບ ຊຶ່ງໄລຍະທີໜຶ່ງ ລົງທຶນ 3.300.000 ໂດລາ ຫຼື ປະມານ 28,08 ຕື້ກີບ. ປັດຈຸບັນ ໄດ້ກະກຽມເງື່ອນໄຂການດໍາເນີນງານເປັນທີ່ຮຽບຮ້ອຍ ເຊັ່ນ: ບຸກຄະລາກອນ ແລະ ອຸປະກອນເຄື່ອງຈັກ.

                                                                                                                                                                                                         

                                                                                                                                                                                                                    ບົດຂ່າວ: ນ. ທັດສະນີ ພົງບັນດິດ

                                                                                                                                                                                                                    ຮູບພາບ: ອໍລະຊຸນ ມະນີ