ໜ້າຫຼັກ

ກ່ຽວກັບພວກເຮົາ

ຂ່າວ ແລະ ກິດຈະກຳ

ນິຕິກຳ

ສື່ ແລະ ສິ່ງພິມ

ຕິດຕໍ່ພວກເຮົາ

ຂ່າວສານ
  • Register
ວັນພຸດ, 19 ກັນຍາ 2018 00:00

ຮ່ວມມືສ້າງຫ້ອງການ ເພື່ອຢັ້ງຢືນລະບົບ ຄວາມສອດຄ່ອງ ແລະ ຄວາມປອດໄພຂອງ ເຕັກໂນໂລຊີຂໍ້ມູນຂ່າວສານ ແລະ ລະບົບການຄຸ້ມຄອງບໍລິຫານຄຸນນະພາບຕາມມາດຕະຖານສາກົນ Featured

ກົມມາດຕະຖານ ແລະ ວັດແທກ, ກະຊວງວິທະຍາສາດ ແລະ ເຕັກໂນໂລຊີ ຮ່ວມກັບ ບໍລິສັດ LaoNet Communication ຈຳກັດຜູ້ດຽວ ເຊັນບົດບັນທຶກຄວາມເຂົ້າໃຈ ການສ້າງຫ້ອງການ ເພື່ອຢັ້ງຢືນລະບົບຄວາມສອດຄ່ອງ ແລະ ຄວາມປອດໄພ ຂອງເຕັກໂນໂລຊີຂໍ້ມູນຂ່າວສານ ແລະ ລະບົບການຄຸ້ມຄອງບໍລິຫານຄຸນນະພາບຕາມມາດຕະຖານສາກົນ ໃນຕອນແລງວັນທີ 18 ກັນຍາ 2018 ທີ່ໂຮງແຮມ ຄຣາວ ພລາຊາ, ນະຄອນຫຼວງວຽງຈັນ

ການລົງນາມເຊັນບົດບັນທຶກໃນຄັ້ງນີ້ ກໍເພື່ອແນໃສ່ການເຫັນໄດ້ຄວາມສຳຄັນຂອງວຽກງານມາດຕະຖານ ແລະ ວັດແທກ ຕໍ່ກັບການສ້າງ ຄວາມຍຸດຕິທຳ ແລະ ການປົກປ້ອງສິດຜົນປະໂຫຍດຂອງສັງຄົມ ໃນການແກ້ໄຂປະກົດການຍໍ້ທໍ້ຕ່າງຕ່າງໆ ແລະ ທັງເປັນການປົກປ້ອງຜູ້ບໍລິໂພກ ຢູ່ໃນ ສປປ ລາວ ໃຫ້ຮັບປະກັນຄຸນນະພາບ ແລະ ຖືກຕ້ອງ-ສອດຄ່ອງ ຕາມລະບຽບ ຫຼັການ ຂອງມາດຕະຖານແຫ່ງຊາດ ແລະ ມາດຕະຖານສາກົນ ກ່ຽວກັບວຽກງານ ລະບົບຄວາມສອດຄ່ອງ ແລະ ຄວາມປອດໄພ ຂອງເຕັກໂນໂລຊີຂໍ້ມູນຂ່າວສານ ແລະ ລະບົບການຄຸ້ມຄອງບໍລິຫານຄຸນນະພາບ.

ການລົງນາມຄັ້ງນີ້ທັງສອງຝ່າຍຈະໄດ້ຮ່ວມມືກັນສຶກສາຄົ້ນຄວ້າ ແລະ ປະສານສົມທົບກັບບັນດາພາກ ສ່ວນທີ່ກ່ຽວຂ້ອງໃນການຈັດຕັ້ງປະຕິບັດບັນດາໜ້າວຽກງານຕ່າງໆ ໃຫ້ໄດ້ຮັບຜົນສຳເລັດ ເຊັ່ນ: ການສ້າງພື້ນຖານໂຄງລ່າງ ລວມມີທັງການສ້າງຫ້ອງການ, ຫ້ອງທົດລອງ, ການສະໜອງເຄື່ອງຈັກ, ປະກອບເຄື່ອງມື, ອຸປະກອນການທົດສອບ-ການວັດແທກຄົບຊຸດ, ການສ້າງບັນດານິຕິກຳ, ລະບຽບການ, ຂໍ້ກຳນົດ ແລະ ອຶ່ນໆ. ພ້ອມນັ້ນ, ຍັງຈະໄດ້ມີການສ້າງ ແລະ ພັດທະນາດ້ານບຸກຄະລາກອນສະເພາະ ໃນໄລຍະສັ້ນ ແລະ ໄລຍະຍາວ ເພື່ອຮອງຮັບວຽກງານດັ່ງກ່າວນີ້.

ລົງນາມໃນຄັ້ງນີ້ມີທ່ານ ວຽງທອງ ວົງທະວິໄລ, ຫົວໜ້າກົມມາດຕະຖານ ແລະ ວັດແທກ, ທ່ານ ບຸນໂຮມ ພານຸວົງ, ຫົວໜ້າ ສູນຢັ້ງຢືນມາດຕະຖານ ແລະ ກວດກາຄຸນນະພາບ ແຫ່ງຊາດ ແລະ ທ່ານ ມາຕັ່ນ ຜູ້ຈັດການ ບໍລິສັດ LaoNet Communication ຈຳກັດຜູ້ດຽວ ໂດຍໃຫ້ກຽດເຂົ້າຮ່ວມເປັນສັກຂີພິຍານຂອງທ່ານ ບັນດິດ ສຈ. ບໍ່ວຽງຄຳ ວົງດາລາ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ທ່ານ ປອ. ຈັນແສງ ພິມມະວົງ,​ ຮອງລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ, ບັນດາຫົວໜ້າຫ້ອງການ, ກົມ, ສະຖາບັນ ພ້ອມພະນັກງານພາກສ່ວນທີ່ກ່ຽວຂ້ອງເຂົ້າຮ່ວມ.

ຂ່າວ: ບຸນທັນ ນັນທະວົງ

ຮູບພາບ: ວິໄລລັກ ອ່ອນສີພັນລາ