ກິດຈະກຳ
  • Register
ວັນຈັນ, 28 ກັນຍາ 2015 00:00

ກົມມາດຕະຖານ ແລະ ວັດແທກ ຈັດກອງປະ ຊຸມສະຫຼຸບຜົນງານ 6 ເດືອນຕົ້ນປີ, ແຜນການ 6 ເດືອນທ້າຍປີ ແລະ ປະກາດ ກົງຈັກການຈັດຕັ້ງ ໃໝ່

ກົມມາດຕະຖານ ແລະ ວັດແທກ, ກະຊວງ ວິທະຍາສາດ ແລະ ເຕັກໂນໂລຊີ (ກວຕ) ໄດ້ຈັດກອງ ປະຊຸມ ສະຫຼຸບຜົນງານ 6 ເດືອນຕົ້ນປີ ແລະ ປະກາດການຈັດຕັ້ງ ຂຶ້ນໃນວັນທີ 20 ສິງຫາ 2015 ທີ່ຜ່ານມາ ພາຍໃຕ້ ການເຂົ້າຮ່ວມເປັນປະທານ ຂອງທ່ານ ບັນດິດ ສຈ. ບໍ່ວຽງຄຳ ວົງດາລາ, ລັດຖະມົນຕີວ່າການ ກວຕ, ມີບັນດາ ທ່ານ ລັດຖະມົນຕີຊ່ວຍວ່າການ ກວຕ, ບັນດາຜູ້ຕາງໜ້າຫ້ອງການ, ກົມ, ສະຖາບັນ ແລະ ພະນັກງານກົມ ດັ່ງກ່າວເຂົ້າຮ່ວມ.

 

ທ່ານ ບຸນປອນ ບົວແພງ, ຮັກສາການ ຫົວໜ້າກົມ ມາດຕະຖານ ແລະ ວັດແທກ ໄດ້ຜ່ານບົດສະຫຼຸບ ການເຄື່ອນໄຫວວຽກງານໃນໄລຍະ 6 ເດືອນຜ່ານມາຕໍ່ທີ່ປະຊຸມ ໃນບົດສະຫຼຸບລາຍງານໄດ້ຍົກໃຫ້ເຫັນຜົນ ງານອັນພົ້ນເດັ່ນຈຳນວນໜຶ່ງ ເຊັ່ນ: ຂົງເຂດວຽກງານວັດແທກ ໄດ້ກວດສອບຊິງຊັ່ງລົດບັນທຸກ 22 ໜ່ວຍ; ຊິງຊັ່ງຫ້ອງທົດລອງ 22 ໜ່ວຍ; ແມ່ແບບນ້ຳໜັກ 99 ໜ່ວຍ; ໄດ້ກວດສອບບໍລິມາດລົດບັນທຸກນ້ຳມັນເຊື້ອໄຟ 221 ຄັນ, ໃນນັ້ນມີລົດໃໝ່ 53 ຄັນ, ລົດທີ່ເຄີຍກວດສອບຜ່ານມາ 168 ຄັນ; ໂຟໂລມິດເຕີ 42 ໜ່ວຍ; ຖັງຜອງບໍລິມາດປະເພດ 1000, 200, 5 ລິດ ໄດ້ 19 ໜ່ວຍ; ໄດ້ສອບທຽບ ຄາລິບເປີ 4 ອັນ, ໄມໂຄແມັດເຕີ 2 ອັນ; ກວດສອບຄວາມຊັດເຈນຂອງ ກົງເຕີໄຟຟ້າ ທີ່ນຳເຂົ້າມາໃໝ່ 57.316 ໜ່ວຍ; ໄດ້ມອບ ຖັງຜອງບໍລິມາດນ້ຳມັນ 5 ລີດໃຫ້ແກ່ພະແນກວິທະຍາສາດ ແລະ ເຕັກໂນໂລຊີແຂວງ ໄດ້ຈຳນວນ 3 ໜ່ວຍ;ລົງກວດ ກາຕິດຕາມການຈຳໜ່າຍນໍ້າມັນເຊື້ອໄຟ ຂອງບັນດາຫົວປໍ້າຈຳໜ່າຍນໍ້າມັນເຊື້ອໄຟໃນນະຄອນຫຼວງໄດ້ 45 ຫົວປໍ້າ; ລົງແກ້ໄຂຂໍ້ຂັດແຍ່ງກ່ຽວກັບການນຳໃຊ້ ກົງເຕີໄຟຟ້າ ຂອງປະຊາຊົນບ້ານນາສ້ຽວ ແລະ ບ້ານ ນາຊາຍທອງ; ລົງກວດກາຕິດຕາມການນຳໃຊ້ຊິງຊັ່ງຢູ່ຕະຫຼາດຫົວຂົວ, ຕະຫຼາດໂນນສະຫວ່າງ, ໂພນຕ້ອງ ຕາມການຮ້ອງຮຽນ ໂທລະສັບສາຍດ່ວນຂອງສະພາ.

ນອກຈາກນັ້ນຍັງໄດ້ຮ່ວມມືກັບບັນດາປະເທດໃນພາກພື້ນ ແລະ ສາກົນໃນຂົງເຂດວຽກງານມາດຕະຖານ ແລະ ວັດແທກ ເປັນຕົ້ນແມ່ນ ສສຫວຽດນາມ, ຣາຊະອານາຈັກໄທ, ເບລາລຸດ, ສປເກົາຫຼີ, ອົງການມາດຕະຖານສາກົນສະຫະລັດອາເມລິກາ (ASTM), ອົງການ UNIDO ແລະ ອື່ນໆອີກ.

ຂ່າວໃຫ້ຮູ້ຕື່ມວ່າ: ສຳລັບແຜນການ ແລະ ທິດທາງໃນ 6 ເດືອນທ້າຍປີ 2015 ນີ້, ກົມມາດຕະຖານ ແລະ ວັດແທກ ຈະສືບຕໍ່ຈັດຕັ້ງປະຕິບັດບັນດາວຽກງານ ສຳຄັນຈຳນວນໜຶ່ງ ເປັນຕົ້ນແມ່ນ: ສືບຕໍ່ລົງເລິກໃກ້ສິດຕິດແທດສຶກສາ ອົບຮົມ ການເມືອງແນວຄິດໃຫ້ພະນັກງານ ພາຍໃນກົມ ເພື່ອໃຫ້ທຸກຄົນມີແນວຄິດອຸ່ນອ່ຽງ ທຸ່ນທ່ຽງ ແລະ ໃຫ້ຕັ້ງໜ້າປະຕິບັດໜ້າທີວຽກງານຂອງຕົນ, ສືບຕໍ່ໂຄສະນາ ເຜີຍແຜ່, ສ້າງຈິດສຳນຶກ, ຖ່າຍທອດຄວາມຮູ້ໃຫ້ແກ່ສັງຄົມກ່ຽວກັບວຽກງານມາດ ຕະຖານ ແລະ ວັດແທກ, ສືບຕໍ່ຍົກລະດັບຄວາມຮູ້ຄວາມສາມາດ ໃຫ້ພະນັກງານ, ສືບຕໍ່ສ້າງນິຕິກໍາຕ່າງໆ ໃນຂົງເຂດວຽກງານມາດຕະຖານ ແລະ ວັດແທກ ເພື່ອຮອງ ຮັບວຽກງານໃນອານາຄົດ, ເຮັດຕົວຢ່າງຊິງກາງປະຈຳຕະຫຼາດ ມອບໃຫ້ບັນດາ ພະແນກວິທະຍາສາດ ແລະ ເຕັກໂນໂລຊີ ແຂວງ, ນະຄອນຫຼວງເພື່ອປົກປ້ອງສິດ ແລະ ຜົນປະໂຫຍດຂອງຜູ້ບໍລິໂພກໃຫ້ໄດ້ຮັບຄວາມເປັນທຳ, ຈັດການປະກວດ ແລະ ໃຫ້ລາງວັນຜະລິດຕະພັນທີ່ມີຄຸນນະພາບດີເດັ່ນ, ສືບຕໍ່ຮ່ວມມືກັບບັນດາປະເທດໃນ ພາກພື້ນ ແລະ ສາກົນ ໃນວຽກງານມາດຕະຖານ ແລະ ວັດແທກ.

ໃນກອງປະຊຸມຍັງໄດ້ຜ່ານຂໍ້ຕົກລົງແຕ່ງຕັ້ງ ຂອງລັດຖະມົນຕີວ່າການ ກະຊວງວິທະຍາສາດ ແລະ ເຕັກໂນໂລຊີ ວ່າດ້ວຍຂໍ້ຕົກລົງແຕ່ງຕັ້ງຮອງຫົວໜ້າກົມ ໂດຍແຕ່ງຕັ້ງ ທ່ານ ສຸກສະຫວາດ ສີຫາປັນຍາ ຫົວໜ້າ ສູນຄຸນນະພາບ ເປັນຮອງຫົວໜ້າກົມ ມາດຕະຖານ ແລະ ວັດແທກ, ພ້ອມນັ້ນກໍໄດ້ແຕ່ງຕັ້ງ ຫົວໜ້າພະແນກ ແລະ ຮອງພະແນກ ພາຍໃນກົມ ຈໍານວນໜຶ່ງ ເພື່ອຮອງຮັບໃຫ້ແກ່ການຈັດຕັ້ງປະຕິບັດຕາມການມອບໝາຍໃນຕໍ່ໜ້າ.

Latest from