ໜ້າຫຼັກ

ກ່ຽວກັບພວກເຮົາ

ຂ່າວ ແລະ ກິດຈະກຳ

ນິຕິກຳ

ສື່ ແລະ ສິ່ງພິມ

ຕິດຕໍ່ພວກເຮົາ

ກິດຈະກຳ
  • Register
ວັນຈັນ, 28 ກັນຍາ 2015 00:00

ສ້າງຄວາມເຂັ້ມແຂງໃນການຄຸ້ມຄອງວຽກງານ ມາດຕະຖານ ແລະ ວັດແທກ ຢູ່ແຂວງ ໄຊສົມບູນ

ເພື່ອເປັນການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ 9 ຂອງພັກ ໃນການສ້າງບາດກ້າວບຸກທະລຸໃນ ສີ່ດ້ານ

ໃຫ້ປະກົດຜົນເປັນຈິງ ໂດຍສະເພາະ ແມ່ນບຸກທະທາງດ້ານຈິນຕະນາການ ແລະ ຊັບພະຍາກອນມະນຸດເພື່ອ ຍົກລະດັບຄວາມຮູ້ ຄວາມສາມາດ ພື້ນຖານວິທະຍາສາດເຕັກນິກໃຫ້ແກ່ທ້ອງຖິ່ນຢູ່ເຂດຫ່າງໄກ ໃຫ້ຄຽງຄູ່ ກັບຄວາມຮຽກຮ້ອງຕ້ອງການ ຂອງການພັດທະນາທ້ອງຖິ່ນໃຫ້ດີຂຶ້ນເທື່ອລະກ້າວ.

 

ໃນຕອນເຊົ້າຂອງວັນທີ 28 ກໍລະກົດ 2015 ຢູ່ທີ່ສະໂມສອນເມືອງອະນຸວົງ, ແຂວງ ໄຊສົມບູນ ໄດ້ຈັດກອງປະຊຸມຝຶກອົບຮົມ ກ່ຽວກັບການສ້າງຄວາມເຂັ້ມແຂງ ໃນການຄຸ້ມຄອງວຽກງານມາດຕະຖານ ແລະ ວັດແທກ ຂຶ້ນຊຶ່ງຈັດໂດຍ ກົມມາດຕະຖານແລະວັດແທກ, ກະຊວງວິທະຍາສາດແລະເຕັກໂນໂລຊີ (ກວຕ) ຮ່ວມກັບ ພະແນກວິທະຍາສາດ ແລະ ເຕັກໂນໂລຊີ ແຂວງ ໄຊສົມບູນ ໂດຍພາຍໃຕ້ການເປັນປະທານຮ່ວມ ຂອງ ທ່ານ ດຣ. ສາຄອນ ຈະເລີນວົງ, ລັດຖະມົນຕີຊ່ວຍວ່າການ ກວຕ, ທ່ານ ບຸນຜັນ ພົມມະຈັນ, ຄະນະ ປະຈຳພັກແຂວງ, ປະທານກວດກາພັກແຂວງ, ເຂົ້າຮ່ວມໃນກອງປະຊຸມໃນຄັ້ງນີ້ມີທ່ານວຽງທອງວົງທະວີໄລ, ຮອງຫົວໜ້າກົມມາດຕະຖານແລະວັດແທກ, ກວຕ, ມີ ທ່ານ ບີເຮີ່, ຫົວໜ້າພະແນກວິທະຍາສາດ ແລະ ເຕັກໂນໂລຊີ ແຂວງໄຊສົມບູນ, ມີບັນດາຫົວໜ້າພະແນກ, ຮອງພະແນກ, ຂອງພະແນກການຕ່າງໆອ້ອມຂ້າງແຂວງ, ຫ້ອງການວິທະຍາສາດເມືອງ, ພະນັກງານວິຊາການທັງສູນກາງ ແລະ ທ້ອງຖີ່ນຈຳນວນ 49 ທ່ານ.

ຈຸດປະສົງຂອງກອງປະຊຸມຝຶກອົບຮົມໃນຄັ້ງນີ້ ແມ່ນເພື່ອເຮັດໃຫ້ບັນດາພະແນກການຕ່າງໆອ້ອມຂ້າງແຂວງ ແລະ ພະນັກງານວິຊາການ ໄດ້ຮັບຮູ້ ແລະ ເຂົ້າໃຈເຖິງຄວາມໝາຍຄວາມສຳຄັນ ຂອງວຽກງານວິທະຍາສາດ ແລະ ເຕັກໂນໂນໂລຊີ ໂດຍສະເພາະ ແມ່ນວຽກງານກ່ຽວກັບມາດຕະຖານ ແລະ ວັດແທກ ເພື່ອຍົກ ລະດັບຄວາມຮູ້ ຄວາມສາມາດ ພື້ນຖານວິທະຍາສາດເຕັກນິກໃຫ້ແກ່ທ້ອງຖີ່ນໂດຍສະເພາະແມ່ນ ວິທີການກວດສອບຊິງຊັ່ງ, ຫົວຈ່າຍປ້ຳນ້ຳມັນ, ກົງເຕີໄຟຟ້າ ແລະ ກົງເຕີນ້ຳປະປາ. ທັງນີ້ກໍເພື່ອສ້າງຄວາມເຊື່ອໝັ້ນ ປົກປ້ອງສິດຜົນປະໂຫຍດຂອງຜູ້ຜະລິດ ແລະ ຜູ້ຊົມໃຊ້ໃຫ້ໄດ້ຮັບຄວາມຍຸດຕິທຳ.

ພ້ອມດຽວກັນ ທ່ານຫົວໜ້າພະແນກວິທະຍາສາດ ແລະ ເຕັກໂນໂລຊີ ແຂວງ ໄຊສົມບູນ ຍັງໄດ້ສະຫຼຸບ ລາຍງານສະພາບການເຄື່ອນໄຫວວຽກງານຮອບດ້ານ ຂອງຂະແໜງວິທະຍາສາດ ແລະ ເຕັກໂນໂລຊີ ທົ່ວແຂວງໄຊສົມບູນ ໃນໄລຍະຜ່ານ ແລະ ທິດທາງແຜນການໃນຕໍ່ໜ້າ.

ໃນໂອກາດກ່າວເປິດກອງປະຊຸມຄັ້ງນີ້ ທ່ານ ດຣ. ສາຄອນ ຈະເລີນວົງ, ລັດຖະມົນຕີຊ່ວຍວ່າການ ກວຕ ໄດ້ກ່າວບາງຕອນວ່າ: ວຽກງານມາດຕະຖານ ໄດ້ມີ ການຂະຫຍາຍຕົວຢ່າງຕໍ່ເນື່ອງ ແລະ ມີຄວາມສຳຄັນໃນການພັດທະນາເສດຖະກິດ ໂດຍສະເພາະ ສປປ ລາວ ໄດ້ເຂົ້າເປັນສະມາຊິກຂອງອົງການການຄ້າໂລກ, ໃນ ທ້າຍປີ 2007 ລັດຖະບານຈຶ່ງໄດ້ເຫັນດີໃຫ້ອອກກົດໝາຍວ່າດ້ວຍ ມາດຕະຖານ ແລະ ຮັບຮອງເອົາດຳລັດຈັດຕັ້ງປະຕິບັດກົດໝາຍ ວ່າດ້ວຍ ມາດຕະຖານໃນເດືອນ 5 ປີ 2012 ແລະ ປັບປຸງກົດໝາຍດັ່ງກ່າວ ໃນວັນທີ 18 ກໍລະກົດ 2014 ແນໃສ່ເພື່ອຮັບປະກັນສິດຜົນປະໂຫຍດຂອງສັງຄົມ. ທັງນີ້ ກໍເພື່ອເຮັດ ໃຫ້ສາມາດເຄື່ອນໄຫວ ວຽກງານທາງດ້ານມາດຕະຖານ ການກວດຄຸນນະພາບສິນຄ້ານຳເຂົ້າພາຍໃນທ້ອງຖີ່ນ, ການກວດສອບ ແລະ ສົມທຽບ ອຸປະກອນວັດແທກປະເພດຕ່າງໆ ເປັນຕົ້ນ ກົງເຕີນໍ້າປະປາ, ກົງເຕີໄຟຟ້າ, ຊິງຊັ່ງ, ຫົວຈ່າຍນ້ຳມັນ ແລະ ອື່ນໆ ແນໃສ່ໃຫ້ຂະແໜງການທີ່ກ່ຽວຂ້ອງ ໂດຍສະເພາະ ຂະແໜງການວິທະຍາສາດ ແລະ ເຕັກ ໂນໂລຊີ ໃນລະດັບທ້ອງຖິ່ນ ສາມາດເຄື່ອນໄຫວສ້າງຄວາມເຊື່ອໝັ້ນໃຫ້ແກ່ສັງຄົມ ແລະ ປົກປ້ອງສິດຜົນປະໂຫຍດຂອງ ຜູ້ຜະລິດ ແລະ ຜູ້ຊົມໃຊ້ ກໍຄືຊີວິດການເປັນຢູ່ຂອງປະ ຊາຊົນບັນດາເຜົ່າພາຍໃນທ້ອງຖິ່ນຂອງຕົນ ໃຫ້ນັບມື້ນັບເຂັ້ມແຂງ.

ໂອກາດດຽວກັນນີ້ ກະຊວງວິທະຍາສາດ ແລະ ເຕັກໂນໂລຊີ ກໍໄດ້ມອບອຸປະກອນເຄື່ອງໃຊ້ຫ້ອງການໃຫ້ແກ່ພະແນກວິທະຍາສາດ ແລະ ເຕັກໂນໂລຊີ ແຂວງ ໄຊສົມບູນ ເພື່ອນໍາໃຊ້ເຂົ້າໃນການຈັດຕັ້ງປະຕິບັດໜ້າທີ່ວຽກງານຂອງຕົນ ຊຶ່ງປະກອບມີ: ຄອມພິວເຕີຕັ້ງໂຕະ 2 ໜ່ວຍ,ຄອມພິວເຕີ (Laptop) 2 ໜ່ວຍ, ເຄື່ອງພິມເອກະສານ 2 ໜ່ວຍ, ເຄື່ອງແຟັກເອກະສານ 1 ໜ່ວຍ, ຈັກກອບປີ 1 ໜ່ວຍ, ຖັງຜອງນ້ຳມັນ 3 ໜ່ວຍ ແລະ ແມ່ແບບນ້ຳໜັກ 2 ຊຸດ ລວມມູນຄ່າທັງໝົດ 126 ລ້ານກວ່າກີບ.

ກອງປະຊຸມດັ່ງກ່າວແມ່ນໄດ້ດຳເນີນເປັນເວລາ 3 ວັນ ຈຶ່ງໄດ້ສໍາເລັດ.

Latest from