ກິດຈະກຳ
  • Register
ວັນຈັນ, 28 ກັນຍາ 2015 00:00

ກອງປະຊຸມກ່ຽວກັບການນຳສະເໜີ ລະບົບການຄຸ້ມຄອງຄຸນນະພາບ ສຳລັບທຸລະກິດຂະໜາດນ້ອຍ ແລະ ກາງ

ວຽກງານລະບົບການຄຸ້ມຄອງຄຸນນະພາບ ສຳລັບທຸລະ ກິດຂະໜາດນ້ອຍ ແລະ ຂະໜາດກາງ ເປັນວຽກງານ ໜຶ່ງທີ່ສຳຄັນ ແລະ ມີຄວາມຈຳເປັນຫຼາຍ ສຳລັບໂຄງລ່າງດ້ານຄຸນນະພາບແຫ່ງຊາດ ຊຶ່ງເປັນການກະກຽມຄວາມ ພ້ອມຂອງ ສປປ ລາວ ໃນການກ້າວ ເຂົ້າເປັນປະຊາຄົມເສດຖະກິດອາຊຽນໃນທ້າຍປີ 2015. ກົມມາດຕະຖານ ແລະ ວັດແທກ, ກະຊວງວິທະຍາສາດ ແລະ ເຕັກໂນໂລຊີ (ກວຕ) ຮ່ວມກັບ ຊ່ຽວຊານຈາກ ທາງໂຄງການ EIF TIER II ໄດ້ຈັດກອງປະຊຸມກ່ຽວກັບການນຳສະເໜີລະບົບການຄຸ້ມຄອງ ຄຸນນະພາບ ສຳລັບທຸລະກິດຂະ ໜາດນ້ອຍ ແລະກາງ ຂື້ນໃນວັນ 22 ພຶດສະພາ 2015 ຢູ່ໂຮງແຮມເມີກຽວ, ນະຄອນຫຼວງວຽງຈັນໂດຍການເປັນປະທານຂອງ ທ່ານ ບຸນປອນ ບົວແພງ, ຮັກສາການຫົວໜ້າກົມມາດຕະ ຖານ ແລະ ວັດແທກ, ກວຕ.

 

ຈຸດປະສົງຂອງກອງປະຊຸມຄັ້ງນີ້ ເພື່ອສືບຕໍ່ວຽກງານລະບົບການຄຸ້ມຄອງຄຸນນະພາບ ISO 9001 ສຳລັບບັນດາຫົວ ໜ່ວຍທຸລະກິດຂະໜາດນ້ອຍ ແລະ ກາງ ທັງເປັນການຍົກລະດັບຄວາມຮູ້ດ້ານວິຊາການ ໃຫ້ແກ່ບັນດາພະນັກງານຂອງພາກລັດ-ເອກະຊົນ ໃຫ້ມີຄວາມເຂົ້າໃຈກ່ຽວກັບຄວາມຮູ້ພື້ນຖານ ກ່ຽວກັບມາດຕະຖານ ສາກົນ ຊຶ່ງຕິດພັນກັບວຽກງານຄຸນນະພາບ ແລະ ການຍົກລະດັບຄວາມຮູ້ ແລະ ຄວາມເຂົ້າໃຈກ່ຽວກັບຄວາມສຳຄັນ ແລະ ການນຳໃຊ້ມາດຕະຖານສາກົນ ໂດຍສະ ເພາະບັນດາປະເທດທີ່ກຳລັງພັດທະນາ.

ໂອກາດນີ້, ທ່ານ ບຸນປອນ ບົວແພງ, ຮັກສາການຫົວໜ້າກົມມາດຕະຖານ ແລະ ວັດແທກ, ກວຕ ໄດ້ກ່າວເປິດກອງປະຊຸມວ່າ: ວຽກງານລະບົບການຄຸ້ມຄອງ ຄຸນນະພາບ ແມ່ນວຽກງານໜຶ່ງທີ່ສຳຄັນ ແລະ ຕ້ອງການໃນການປັບປຸງຄຸນນະພາບແຫ່ງຊາດ ກໍຄືການສ້າງຄວາມອາດສາມາດໃຫ້ພະນັກງານດ້ານການຄຸ້ມຄອງຄຸນ ນະພາບ. ດັ່ງນັ້ນ, ທາງກົມພວກເຮົາ ຈຶ່ງໄດ້ຈັດການຝຶກອົບຮົມໄລຍະສັ້ນຂື້ນ ເພື່ອສ້າງຄວາມເຂົ້າໃຈ ແລະ ຄວາມສາມາດໃຫ້ແກ່ພະນັກງານ ທີ່ກ່ຽວຂ້ອງກັບ ວຽກງານ ດັ່ງກ່າວ ເພື່ອຈັດຕັ້ງປະຕິບັດວຽກງານການຢັ້ງຢືນ ຜະລິຕະພັນ ໃຫ້ສອດຄ່ອງກັບລະບຽບການຂອງພາກພື້ນ ແລະ ມາດຕະຖານສາກົນ ISO 9001. ພ້ອມດຽວກັນນີ້ ກໍເພື່ອກຽມພ້ອມການສ້າງພື້ນຖານໂຄງລ່າງດ້ານຄຸນນະພາບຂອງ ສປປ ລາວ ໃຫ້ມີຄວາມເຂັ້ມແຂງໃນການກ້າວເຂົ້າເປັນປະຊາຄົມເສດຖະກິດອາຊຽນ ໃນທ້າຍປີ 2015 ນີ້ ແລະ ທັງເປັນການສ້າງຄວາມອາດສາມາດ ໃນດ້ານລະບົບການຄຸ້ມຄອງຄຸນ ນະພາບຂອງພວກເຮົາ ໃຫ້ເປັນທີ່ຮູ້ຈັກໃນພາກພື້ນ ແລະ ສາກົນ ເພື່ອເປັນບ່ອນ ອີງ ແລະ ເປັນສີ່ງອຳນວຍຄວາມສະດວກ ໃຫ້ແກ່ວຽກງານການຄວບຄຸມຄຸນນະພາບຜະລິຕະພັນ ແລະ ສີນຄ້າທີ່ຜະລິດ ແລະ ນຳເຂົ້າຢູ່ ສປປ ລາວ.

ວິທະຍາກອນທີ່ບັນຍາຍຢູ່ກອງປະຊຸມຄັ້ງນີ້ ແມ່ນຊ່ຽວຊານຈາກທາງໂຄງການ EIF TIER II ແລະ ນັກສຳມະນາກອນທີ່ເຂົ້າຮ່ວມກອງປະຊຸມດັ່ງກ່າວ ມາຈາກບັນດາຂະ ແໜງການຕ່າງໆເຊັ່ນ: ກະຊວງສາທາລະນະສຸກ, ຫ້ອງການພັດທະນາສົ່ງເສີມວິສາຫະກິດຂະນ້ອຍ ແລະກາງ, ສະພາການຄ້າ ແລະ ອຸດສາຫະກຳ, ລັດວິສາຫະກິດສຳຫຼວດ, ອອກແບບ ແລະວິໄຈວັດສະດຸກໍ່ສ້າງ, ລັດວິສາຫະກິດການບິນລາວ, ລັດວິສາຫະກິດໄຟຟ້າລາວ, ລັດວິສາຫະກິດຄົມມະນາຄົມ, ລັດວິສາຫະ ກິດໄປສະນີໂທລະຄົມມະນາຄົມ, ບັນດາບໍລິສັດທີ່ກ່ຽວ ຂ້ອງ ແລະພະນັກງານພາຍໃນກົມ ຈຳນວນທັງໝົດ 30 ກວ່າທ່ານ.

Latest from