ຝຶກອົບຮົມ
  • Register
ວັນສຸກ, 27 ເມສາ 2018 00:00

ພິທີປິດການຝຶກອົບຮົມທິດສະດີການເມືອງ ແລະ ການປົກຄອງ ໄລຍະສັ້ນ 45 ວັນຊຸດທີ I ຂອງກະຊວງວິທະຍາສາດ ແລະ ເຕັກໂນໂລຊີ

         ການຝຶກອົບຮົມທິດສະດີການເມືອງ ແລະ ການປົກຄອງ ໄລຍະສັ້ນ 45 ວັນຊຸດທີ I ໃຫ້ພະນັກງານນຳພາ-ພະນັກງານຫຼັກແຫຼ່ງໃນກະຊວງວິທະຍາສາດ ແລະ ເຕັກໂນໂລຊີ (ກວຕ), ຊຶ່ງໄດ້ດຳເນີນມາແຕ່ວັນທີ 19 ກຸມພາ 2018 ແລະ ໄດ້ສຳເລັດລົງວັນທີ 26 ເມສາ 2016 ດ້ວຍຜົນສຳເລັດອັນຈົບງາມ ໃນຕອນແລງຂອງວັນທີ 26 ເມສາ 2018 ກົມຈັດຕັ້ງ ແລະ ພະນັກງານ, ກວຕ ໄດ້ຈັດພິທີປຶດຊຸດຝຶກອົບຮົມດັ່ງກ່າວ ຢູ່ທີ່ຫ້ອງປະຊຸມ ສະຖາບັນການຄຸ້ມຄອງວິທະຍາສາດ ແລະ ເຕັກໂນໂລຊີ ໂດຍໃຫ້ກຽດເຂົ້າຮ່ວມຂອງທ່ານ ບັນດິດ ສຈ.​ ບໍ່ວຽງຄຳ ວົງດາລາ, ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກວຕ, ມີທ່ານ ປອ ຄຳພັນ ວົງພະຈັນ, ຮອງຫົວໜ້າກົມວິຊາການ, ສະຖາບັນການເມືອງ-ການປົກຄອງແຫ່ງຊາດ, ມີບັນດາທ່ານຮອງລັດຖະມົນຕີ, ບັນດາຄະນະພັກ, ຄະນະນຳຂອງກະຊວງ, ບັນດານັກສຳມະນາກອນຈາກຫ້ອງການ, ກົມ ແລະ ສະຖາບັນພາຍໃນ ກວຕ ເຂົ້າຮ່ວມ.

         ທ່ານ ນາງ ສຸພາລັກ ສີລາເພັດ, ຮອງຫົວໜ້າກົມຈັດຕັ້ງ ແລະ ພະນັກງານ, ຫົວໜ້າຫ້ອງການພັກ ໄດ້ຂຶ້ນຜ່ານບົດສະຫຼຸບຕີລາຄາລວມການຝຶກອົບຮົມ, ການຝຶກອົບຮົມໃນຊຸດນີ້ປະກອບດ້ວຍເອກະສານ 5 ພາກວິຊາ, 37 ບົດ ພ້ອມທັງໄດ້ສົນທະນາແລກປ່ຽນບົດຮຽນ ແລະ ປະສົບການຕົວຈິງຢ່າງກົງໄປກົງມາ, ດ້ວຍບັນຍາກາດຝົດຟື້ນ ແລະ ເຕັມໄປດ້ວຍຄວາມຮັບຜິດຊອບສູງຂອງບັນດາຜູ້ບັນຍາຍທີ່ມາຈາກ ສະຖາບັນການເມືອງການປົກຄອງແຫ່ງຊາດ ແລະ ນັກສຳມະນາກອນ ພາຍໃນ ກວຕ ຊຶ່ງໄດ້ມີຄວາມໝາຍຄວາມສຳຄັນໃຫ້ແກ່ກະຊວງ ເວົ້າລວມ, ເວົ້າສະເພາະແມ່ນ ນັກສຳມະນາກອນທີ່ເຂົ້າຮ່ວມໄດ້ມີການຍົກລະດັບຄວາມຮູ້ຄວາມສາມາດໃຫ້ສູງກວ່າເກົ່າ ສຳເລັດຕາມຄາດໝາຍທີ່ວາງໄວ້.

        ຫຼັງຈາກຜ່ານບົດສະຫຼຸບການຝຶກອົບຮົມແລ້ວກໍໄດ້ມີການມອບໃບຢັ້ງຢືນການຝຶກອົບຮົມແກ່ນັກສຳມະນາກອນ ທັງໝົດ 35 ທ່ານ, ໂດຍໃຫ້ກຽດມອບໂດຍທ່ານ ປອ ຄຳພັນ ວົງພະຈັນ, ຮອງຫົວໜ້າກົມວິຊາການ, ສະຖາບັນການເມືອງ-ການປົກຄອງແຫ່ງຊາດ.

        ໃນໂອກາດດຽວກັນ ທ່ານ ບັນດິດ ສຈ. ບໍ່ວຽງຄຳ ວົງດາລາ ກໍໄດ້ກ່າວສະແດງຄວາມຍ້ອງຍໍຊົມເຊີຍ ແລະ ຂອບໃຈມາຍັງ ສະຖາບັນການເມືອງ-ການປົກຄອງແຫ່ງຊາດ ທີ່ໄດ້ເອົາໃຈໃສ່ໃນການຖ່າຍທອດຄວາມຮູ້ໃຫ້ແກ່ນັກສຳມະນາກອນ ແລະ ທ່ານ ຍັງໄດ້ເນັ້ນໃຫ້ບັນດານັກສຳມະນາກອນຈົ່ງນຳເອົາຄວາມຮູ້ຈາກການຝຶກອົບຮົມໃນຄັ້ງນີ້ໄປຈັດຕັ້ງຜັນຂະຫຍາຍເຂົ້າໃນໜ້າທີຂອງຕົນໃຫ້ເກີດປະສິດທິຜົນດີຂື້ນກວ່າເກົ່າ.

 

ຮູບພາບ: ບິນລີ້ ສີສຸລາດ

ບົດຂ່າວ: ບຸນທັນ ນັນທະວົງ