ຝຶກອົບຮົມ
  • Register
ວັນຈັນ, 27 ມີຖຸນາ 2016 00:00

ກອງປະຊຸມເຜີຍແຜ່ວຽກງານມາດຕະຖານ ແລະ ວັດແທກຕໍ່ການພັດທະນາເສດຖະກິດ-ສັງຄົມ ແລະ ການເຊື່ອມໂຍງເຂົ້າພາກພື້ນ ແລະ ສາກົນ

ກົມມາດຕະຖານ ແລະ ວັດແທກ (ກວມ), ກະຊວງ ວິທະຍາສາດ ແລະ ເຕັກໂນໂລຊີ (ກວຕ), ໄດ້ຈັດ ກອງປະຊຸມເຜີຍແຜ່ກົດໝາຍວ່າດ້ວຍມາດຕະຖານ, ກົດໝາຍວ່າດ້ວຍວັດແທກ ແລະ ຄວາມໝາຍຄວາມສຳຄັນ ຂອງວຽກງານມາດຕະຖານ ແລະ ວັດແທກ ຕໍ່ການພັດທະນາເສດຖະກິດ-ສັງຄົມ ແລະ ການເຊື່ອມໂຍງເຂົ້າສູ່ ພາກພື້ນ ແລະ ສາກົນ ຂຶ້ນໃນວັນທີ 23 ມິຖຸນາ 2016, ທີ່ ໂຮງແຮມລ້ານຊ້າງ ໂດຍການໃຫ້ກຽດເປັນປະ ທານຂອງ ທ່ານ ດຣ. ສາຄອນ ຈະເລີນວົງ, ປະທານສະພາມາດຕະຖານແຫ່ງຊາດ, ຮອງລັດຖະມົນຕີ ກວຕ, ເຂົ້າຮ່ວມພິທີດັ່ງກ່າວມີ ທ່ານ ວຽງທອງ ວົງທະວີໄລ, ຮັກສາການຫົວໜ້າ ກົມມາດຕະຖານ ແລະ ວັດແທກ, ກວຕ, ຮອງກົມ, ຫົວໜ້າພະແນກ, ຮອງພະແນກ, ຜູ້ອຳນວຍການຕາງໜ້າຈາກບໍລິສັດ, ໂຮງໝໍ, ໂຮງຈັກໂຮງ ງານ ຈາກພາກສ່ວນທີ່ກ່ຽວຂ້ອງທັງພາກລັດ ແລະ ເອກະຊົນ, ພ້ອມດ້ວຍພະນັກງານພາຍໃນກົມດັ່ງກ່າວ ຈຳ ນວນ 80 ທ່ານ.

 

ຈຸດປະສົງຂອງການຈັດກອງປະຊຸມໃນຄັ້ງນີ້ແມ່ນ ເພື່ອເປັນການເຜີຍແຜ່ກົດໝາຍກ່ຽວກັບວຽກງານ ມາດຕະຖານ ແລະ ວັດແທກຕໍ່ການພັດທະນາເສດຖະກິດ-ສັງຄົມ ແລະ ການເຊື່ອມໂຍງເຂົ້າສູ່ພາກພື້ນ ແລະ ສາກົນ, ເພື່ອເປັນການເອກະພາບກັນໃນການຈັດຕັ້ງ ປະຕິບັດໃນຂອບເຂດທົ່ວປະເທດ ແລະ ໃຫ້ມີປະສິດທິພາບ ແລະ ສອດຄ່ອງກັບປະເທດສະມາຊິກອາຊຽນ, ເພື່ອເປັນການປ້ອງກັນຜົນປະໂຫຍດພາຍໃນປະເທດຕົນ ກໍຄື ສປປ ລາວ ໃນການຫຼຸດຜ່ອນອັດຕາພາສີໂດຍການນຳໃຊ້ມາດຕະຖານ ແລະ ການປະເມີນຄວາມສອດຄ່ອງ, ເພື່ອເປັນການປົກປ້ອງສິດຜົນປະໂຫຍດຂອງຜູ້ຜະລິດ ແລະ ຜູ້ຊົມໃຊ້ຈາກດ້ານການຮັກສາຄວາມປອດໄພທາງດ້ານສຸຂະພາບ, ການອະນຸລັກສິ່ງແວດລ້ອມ ແລະ ບົດບາດດ້ານມາດຕະຖານ, ຄຸນນະພາບ ແລະ ວັດແທກ ໃຫ້ນັບມື້ນັບເພີ່ມຂຶ້ນໃນເວທີພາກພື້ນ ແລະ ສາກົນ.

ໃນໂອກາດກ່າວເປີດພິທີດັ່ງກ່າວ, ທ່ານ ດຣ. ສາຄອນ ຈະເລີນວົງ, ປະທານສະພາມາດຕະຖານແຫ່ງຊາດ, ຮອງລັດຖະມົນຕີ ກວຕ ໄດ້ກ່າວບາງຕອນວ່າ: ວຽກງານມາດຕະຖານ ແລະ ວັດແທກ ແມ່ນມີບົດບາດ ແລະ ຄວາມໝາຍຄວາມສຳຄັນໃນການພັດທະນາຢ່າງຍືນຍົງ, ລະບົບການກວດສອບການຮອງຮັບ ຫຼື ລະບົບການປະເມີນຄວາມສອດຄ່ອງສົ່ງເສີມສະມັດຕະພາບຂອງການຜະລິດ, ເຕັກນິກຕ່າງໆກ່ຽວກັບຜະລິດຕະພັນ ແລະ ອຳນວຍຄວາມສະດວກໃຫ້ແກ່ທຸລະກິດ ມີການຂະຫຍາຍຕົວ ໂດຍເຫັນໄດ້ເຖິງບົດບາດຄວາມສໍາຄັນຂອງວຽກງານມາດຕະຖານ ແລະ ວັດແທກ ສະນັ້ນລັດຖະບານກໍຄື ກວຕ, ຈຶ່ງໄດ້ສ້າງຕັ້ງ ກວມ, ຂຶ້ນເປັນ ເສນາທິການໃຫ້ແກ່ ກະຊວງວິທະຍາສາດ ແລະ ເຕັກໂນໂລຊີ ເພື່ອຮອງຮັບການພັດທະນາເສດຖະກິດ-ສັງຄົມ ແລະ ການເປັນສະມາຊິກອົງການ ການຄ້າໂລກ ແລະ ບັນດາອົງການຈັດຕັ້ງສາກົນຕ່າງໆ, ພາຍຫຼັງໄດ້ມີການປັບປຸງກົດໝາຍວ່າດ້ວຍວັດແທກ, ກົດໝາຍວ່າດ້ວຍມາດຕະຖານ ແລະ ສ້າງບັນດານິຕິກຳລຸ່ມ ກົດໝາຍຈຳນວນ ໜຶ່ງເພື່ອແນໃສ່ຮັບປະກັນປົກປ້ອງສິດຜົນປະໂຫຍດ ແລະ ຄວາມຍຸຕິທຳໃຫ້ແກ່ສັງຄົມ.

ກອງປະຊຸມໃນຄັ້ງນີ້ຈະເປັນໂອກາດອັນດີໃຫ້ແກ່ຜູ້ເຂົ້າຮ່ວມໃນການ ຖາມ-ຕອບ ແລກປ່ຽນຄວາມຄິດເຫັນ ແລະ ເປັນບ່ອນອີງໃນການຈັດຕັ້ງປະຕິບັດວຽກ ງານໃຫ້ແກ່ພາກສ່ວນທີ່ກ່ຽວຂ້ອງໃນການເຮັດໃຫ້ຜະລິດຕະພັນມີມາດຕະຖານ ແລະ ຄຸນນະພາບດີໃນຕໍ່ໜ້າ. ກອງປະຊຸມດັ່ງກ່າວແມ່ນໄດ້ດຳເນີນໄປເປັນເວລາ 2 ວັນຈຶ່ງໄດ້ປິດລົງດ້ວຍຜົນສຳເລັດອັນຈົບງາມ.

  Credit: ບົດຂ່າວຈາກເວັບໄຊ ກະຊວງວິທະຍາສາດ ແລະ ເຕັກໂນໂລຊີ

 

 

 

Latest from